Conceyu d’espeleólogos o dalgo asina

 Xesús F. Manteca

Grupu d’Espeleoloxía Gorfolí (Asturies)

www.espeleoastur.as

Data: 26/06/06

espeleolex@espeleoastur.as

Atrás    PDF


La idega d’aconceyase pa entamar a encadarmar otra vuelta esto de la espeleoloxía astur parezme estupenda, pero pa llevala a cau fai falta comprometese, y esto ye lo que falta en gran medía na espeleoloxía d’anguañu, onde la xente -mesmo dientro de grupos que se dediquen a la esploración-, prefier pasase al espeleoturismu en cuantes que les cavidaes o les esploraciones tórnense dures por cualisquier razón. Per otra parte, ye fácil de simplificar el pertenecer a un coleutivu cualisquier con prestixu aceutáu. Ye simplemente comportase como dicimos dende fai munchu tiempu, mas del que podemos remenbrar, nesti país: portase como un paisanu. Y esto trai que’l prestixu hai que lu tener pa ún mesmu. Per otra parte, entiendo qu’esto ye formar un club priváu, onde pa poder ser miembru hai que cumplir una serie requisitos y non una casa pa toos, porque una casa coles puertes abiertes ye mui bien fácil de robar. Equí nun cabe la tolerancia -que, por cierto, ye un conceutu relixosu- y yo yá toi fartu de tener que pedir permisu pa pensar, facer coses o utilizar una llingua minorizada a politiquinos de despachu que, a la fin, lo único que saben facer ye aprovechase de los méritos de los demás. Si esti ye’l plan, nun contéis conmigo. Esto nun puede ser una Federacion paralela. Nel momentu qu’aceutamos que en casu d’accidente naide nun va sacanos les castañes del fueu, ¿pa qué sirve una Federación?. Porque yo yá soi un llobu vieyu al que-y enseñaron que la espeleoloxía yeren valores como’l trabayu n’andecha, la solidaridá, el desendolcu d’una xera nún mediu hostil que requería d’una teúnica y un forma física determinao. Yá nun tengo sitiu nún coleutivu onde a partir d’agora va primar la competitividá. De xuru que pa dalgunos seré un románticu, pero pa otros soi un radical intolerante. Yo nun quiero que cambie la Federación, si nun me convence como furrula marcho y ya tá. Pero nun voi dir a otra estructura igual. Prefiero seguir como toi d’un tiempu a esta parte, actuando de francotirador. Faigo lo que m’apetez, publico lo que m’apetez na llingua que m’apetez y asina toi mui bien agusto. Agora… yo, como l’otru, siendo la xente feliz, yo soi feliz.


Arriba    Atrás    PDF