Carta al Presidente de la FASE

Isidro Baides Morente
Xesús F. Manteca, Xosé Lluis del Río
Grupu d’Espeleoloxía Gorfolí – Asturies

Data: 30/07/01
espeleolex@espeleoastur.as

Atrás    PDF


Sr. Presidente:

Recibimos güei el so escritu de fecha 17/7/2001 informando de les causes del retrasu de la tramitación d’autorizaciones. Esto déxanos bien claro que quien quier facer dalgo alcuentra medios y quien nun quier, alcuentra xustificaciones. A esti escritu nun lu acompanga la referida autorización, colo cual al Grupu d’Espeleoloxía Gorfolí nun-y val pa muncho, puesto que cuando llegue esta autorización, el plan que tenemos fechu so’l calendariu habrá cumplido nes sos feches. Recordámos-y, Sr. Presidente, qu’esta autorización foi solicitada en xineru d’esti añu y que el 20 de Mayu empobinámonos de forma verbal al Parque y a vusté al traviés del teléfonu pa saber como taba’l trámite de la nuestra autorización. Como vusté ya sabe y reconoz nel so escritu entá nun tan firmaes les autorizaciones. ¿Esto ye una xestión axilizada?. La falta d’esta autorización oblíganos a facer les nueses esploraciones en Picos d’Europa fuera de les llendes del Parque Nacional.

Na so xustificación, anecia vusté n’aturullanos col rellumu de los Cargos Alministrativos del nuesu Parque Nacional de los Picos d’Europa y colos sos nomes propios, lo que mos da la midía de la so perceición del mundu: enverde llimitase a ser un bon xestor de los intereses d’un coleutivu al que representa y tien la obligación de defender, vusté prefier siguir xugando a confundir la "política" cola "alministración". ¿Piensa que vamos tragar otra vuelta más coles sos falcatrúes?; ¿piensa de verdá facenos creyer que’l cenciellu trámite alministrativu d’un permisu d’esploración espeleolóxica énte la Direición del Parque Nacional de los Picos d’Europa solicitáu por nós nel mes de xineru depende de que la funcionaria de turno tuviere dío o non de vacaciones en Selmana Santa a Cancún, por exemplu?.

So la so solicitú del resume informativu de les esploraciones d’anguañu, debería vusté remembrar que fai más de dos años qu’aguardamos por estremada documentación que mos ye necesaria pa complementar los nuestros trabayos d’esploración en fasteres dixebraes. Camentamos que l’intercambiu d’información tien de ser un carril con dos sentíos y caberamente dica agora la circulación sólo se produz haza la F.AS.E. y non a la escontra. D’otru llau, el so procuru por respetar los conteníos, condicionáu al espaciu, camentamos ye un forma de censurar aquelles informaciones que nun seyan del so preste, sobre too aquelles escrites en llingua asturiana o colos topónimos escritos n’asturianu. Sirva d’exemplu el resume del Grupu d’Espeleoloxía Gorfolí. Inda más. Dao que la páxina web que creyíamos de la F.AS.E. nun ye tal sinón la so páxina personal pagada con la so propia Visa, tal y como vusté remembró na cabera reunión de l’Asamblea Xeneral de la F.AS.E., encamentámos-y que retire la semeya de la Cueva l’Oyu la Madre y que nun asoleye nesa páxina les otres semeyes d’espeleomerguyu que-y unviamos lluego y de les que son autores miembros del Grupu d’Espeleoloxía Gorfolí.

En referencia a la decisión del Grupu d’Espeleoloxía Gorfolí d’abandonar l’Asamblea la F.E.E., queremos aclara-y, magar que usté yá lo sabe perbién, que nella nós nun yéramos representantes de la espeleoloxía asturiana sinón de tolos grupos d’espeleoloxía del Estáu Español. Nun mire de confundir a los espeleólogos asturianos, porque nós nun tabemos ellí a les órdenes de so. El motivu la nuestra decisión nun foi "una discrepancia" cola F.E.E., sinon l’actitú los sos direutivos, que fixeron por abandonar a un espelelógu federáu que sofriera un acidente: nós nun tamos por compartir mesa con xente qu’utiliza a los espeleólogos como rehenes.

Tamién-y queremos remembrar que’l Grupu d’Espeleoloxía Gorfolí ta asina inscritu nos estremaos muérganos colos que se rellaciona. Nun entendemos esta manera testerona d’aneciar en castellanizar el nome la nuestra asociación. Paez que vusté nun sólo quier torgar los nuestros trabayos d’esploración, ¿quier tamién tapecer el nuestru compromisu cola cultura y la llingua asturianes?.

Ensin otro particular, aprovechamos la ocasión pa saludalu.


Arriba    Atrás     PDF