Expedición Picos 2004
agosto de 2004

Na primera quincena del mes d’Agostu de 2004 desendolcáronse los llabores d’esploración y topografia de l’andecha de los ensames de la FFESSM y de l’Ensame Aguarón, a más de la participación de Josep Guarro y Martín Burgui.

Los trabayos volcaronse nes surdencies esploraes nel añu 2003 y na continuación de la rede de Fonte Obaya. Equi algamaronse más de 700m topografiaos de galeries somorguiaes ente Fuente Santa y Cueva Seca. En Cueva Seca la galeria principal, considerada asina pol volume de les dimensiones y nomada Galeria Aconeyante, llevose la punta a 370m dempués d’un perfil trebeyosu que baxa a -41m, sube a -17m, vuelve baxar a -46, dempués de ciertu percorriu sube a -35, torna a baxar a -52 y fina’l filu en -40m n’una galería de grandes medies que sigue subiendo. Na galeria de la drecha esploraronse 322m con una fondura másima de -35 m fasta salir a una pequeña campana ú la galería torna a somorguiase con una seición inda más estrencha.
Na esguilada entamada l’añu pasau tres del duck, siguiendo el vientu que sal de la cueva cuando’l duck nun ta sifonau, atopose otru duck colgau pero onde fai falta equipu de merguyu que dexa una pequeña resquiebra per onde sopla l’aire fuertemente.

En Fonte Santa nun queda mucho pa empatar col duck de Cueva Seca tres un sifón d’alredor de 100m con dalgunes campanes y remontar dos pequeñes cascaes.
Enantes d’ochobre intentarase continuar de nuevo la esploración en la rede.

Na H.uenti’l Cuélebre nun foi posible facer más que l’añu pasau al atopar a -33m un argayu de grava y sable gordo que peslló el pasu a la galería. Dellos intentos pa franquialu nun sirvieron pa nada, ya que l’argayu taba entá en movimientu. N’una de les vegaes la grava llegó a sapozar les aletes del merguyador que intentaba travesalu.

Les esploraciones na H.uenti l’Alisa dieron como resultao atopar la fin de la cavidá nel 4º sifón ente una resquiebra per onde nun ye posible’l pasu, nun asina como na H.uente Obar, ú s’alcontraron 500m de nueva galería fasta llegar a la base d’una esguilada per onde continua la cueva .

La cueva que más pilancos punso a la continuacion de les esploraciones foi la H.uente la Redonda peles xorrecies constantes de l’agua. Magar d’esto continuose la esploración.

Tamién se merguyó na H.uente los Brazos, pero la corta galería somorguiada cierrase nuna rede de resquiebres per onde solo pasa l’agua.