Les Anuncies – www.espeleoastur.as

Metanes del procesu electoral a l’Asamblea Xeneral, Presidencia y Comisión Delegada de la Federación Española d’Espeleoloxía (FEE), delles Federaciones Autonómiques, Clubes, Deportistes, Teúnicos y Árbitros a comuña, esmolecíos pola pergrave situación na que s’afaya la entidá y la irresponsable actitú de los sos actuales dirixentes, amuesen al traviés d’un comunicáu conxuntu un estudiu que revela la verdadera situación na que s’afaya la Federación deportiva:

Estimáu/ada compañeru/a

Les Federaciones Autonómiques d’Espeleoloxía de:

Asturies, Cantabria, Castiella y Lleón, Castiella-La Mancha, Galicia, Murcia, Navarra, La Rioja y Representantes de Clubes, Deportistes, Téunicos y Árbitros de la FEE

Llevamos trabayando selmanes pa editar esti documentu:

https://docs.google.com/file/d/0B3jlqu5IW6pHVjRxMkJaTW95NEU/edit

Con elli, queremos treslladar al colectivu la real situación económica de la FEE y provocar un debate rigorosu sobre la so xestión na cabera década, el so inmediatu futuru y la responsabilidá individual y coleutiva de tod+s nosotr+s. Resetea, súmate!

RESET FEE
_________________________
25/04/12. 25 de Abril, siempre: http://www.youtube.com/watch?v=66I7rYEKkPs

El prósimu miércoles 25 d’abril, presentación sobre “El Pozo Azul” nes IX Xornaes de Montaña  organizaes polos collaci+s del GM Ibice-Cuadonga, nel Hotel d’Asociaciones de Santuyano n’Uviéu, Avda. Fernández Ladreda, 48. La entrada ye de baldre!.

Gracies, Teca!.

Underground Everest from Greg Atkins on Vimeo.

El prósimu sábadu 14 d’abril, presentación sobre “El Pozo Azul” nes Primeres Xornaes de Buceo en Lleón, organizaes polos collaci+s de los clubes de buceo Kraken y Lleón, nel Hotel Trip (Cai/ Obispu Vilaplana, 3-5. Lleón), la entrada ye de baldre!.

Gracies, Teca!.

Freatic naciera en xineru de 2009 de la mano de Josep Guarro como un proyeutu de formación de calidá n’espeleomerguyu y bucéu téunicu. Col andar del tiempu y yá xunta Hilari Moreno, Freatic Sports, SL ufierta agora tamién material y aperios p’aquelles persones que precisen de los meyores productos pa desendolcar los sos proyeutos y actividaes coles meyores garantíes al traviés de la so tienda online.

Dende equí, dámos-yos la norabona por esta iniciativa y deseámos-yos la meyor de les suertes a los nuesos collacios!

> Freatic - Exploration equipment & training

Los collacios del GE Diañu Burlón vuelven entamar esti añu la organización de los VI Alcuentros de Deportes d’Aventura mentantu los díes 16 y 17 de marzu a partir les 19:00h. nel Salón d’Actos del Centru Sociocultural de Las Vegas (Corvera), cola participación de:

Juan Menéndez Granados - Deportista estremu reconocíu internacionalmente, Juan Menéndez Granaos ye especialista n’espediciones d’alta dificultá en bicicleta y en solitariu pelo más remoto del planeta, yá sía pela selva amazónica, los desiertos australianos, la taiga siberiana o l’Árticu canadiense. Esta sesión ufierta una esperiencia siberiana y solitaria de diecinueve díes, la primer espedición que traviesa ensin parada dala nes orielles el llagu más fondu de la Tierra, merecedora del Premiu Sociedá Xeográfica al “Viaxe del Añu 2010”.

Rosa Fernández – Ye una de les alpinistes más reconocíes internacionalmente, con 6 ochomiles na mochila, va esponenos la película: KANGCHENJUNGA “LA TERCERA MAS ALTA, SEIQUE LA MÁS DIFÍCIL….” La película reflexa la so llucha personal pa cola montaña y conmigo mesma. Volver a los grandes altores dempués de superar un cáncer.

Juanjo Alonso Alonso - El nuesu collaciu del GE Gorfolí Juanjo Alonso dedicó estos caberos años a la documentación del paisax y la fauna de los ríos d’Asturies. Yá sía nún pequenu recodo d’un ríu d’una sierra costera a pocos centímetros de fondura, o no fondero d’una poza de dalgún de los nuesos grandes ríos, Juanjo busca amosar la guapura del ciclu de la vida, convencíu de que conocer ye’l pasu previu a caltener. Editor gráficu de aQa revista, publicó les sos imaxes en museos, publicaciones internacionales, llibros, y revistes como National Geographic.

Ángel García Fuentes –  En 2009 el sistema soterrañu del Mortillano conviértese nel más estensu de la Península Ibérica con 114 Km. de desenvolvimientu. Asitiáu en Soba, Cantabria, anguaño supera los 115 Km. con 950 m. de desnivel ente la so boca mas alta, la Sima del Acebo y los sifones de la cota 300 m.s.n.m. La proyección fai un repás, necesariamente rápido, pola hestoria de les esploraciones nesti macizu. Finalmente preséntense los últimos trabayos realizaos, les característiques del sistema y delles peculiaridaes que pueden atopase nel so interior.

Pa nun se lo perder. Munches gracies y norabona a los Diaños!

El prósimu miércoles día 21 de marzu a les 20:00 h. nel Salón d’Actos de Caxastur en Sama Llangréu, Teca va dar una proyeición sobre les esploraciones en El Pozo Azul (Covanera, Burgos), nel marcu del XI Memorial Manuel Álvarez Díaz, organizáu pola Sociedá de Festeyos y Cultura Santiago Apóstol de Sama y que va cuntar amás con un programa bien interesante desendolcáu del 15 al 23 de marzu dedicáu a proyeiciones sobre carreres de montaña, descenso de cañones y alpinismu.

Gracies a los amigos de la Sociedá de Festeyos y Cultura Santiago Apóstol de Sama y a Teca!

La nuesa collacia Mireia Bolta Josa falleció ayeri domingu día 12 mentantu esploraba nel sistema kársticu de La Motilla, na surdencia de Pasada Blanca del ríu Hozgarganta (Cádiz) y pel momentu nun tenemos muncha más información.

Suenen güei nos nuesos corazones les Campanes de Konevitsa y nel sonar máxicu del kantele suomi -l’instrumentu que fuera creáu pol primer home del mundu na épica finesa- ye fácil sentir el pesu d’esta tristura de plombu, de la pantasma de l’ausencia, del orbayu que mos cala hasta’l güesu. De la señardá boreal que siempre mos va acompañar a tolos que pudimos esfrutar de la sorrisa de Mireia, de les sos ganes de vivir.

Que Deva te guarde, Mireia

Esta ye la nueva páxina con información oficial sobre les esploraciones n’El Pozo Azul (Covanera, Burgos) nes que participamos. Que vos preste!

Gracies, Teca!

> El Pozo Azul (Covanera, Burgos)

Sifón na Cueva l’Arquera. Semeya: Rafa Bernardo (GE Gorfolí)

Los collacios de la SEB Escar tan acabante asoleyar nel blogue del Karst de la Peñe Villa, Llabres y Los Resquilones la reseña de les esploraciones que tan desendolcándose na Cueva l’Arquera (tamién conocida como Cueva las Inxanas o Cueva’l Barcón), en Santoveña, Vibañu (Llanes), nes que participamos xente del GE Gorfolí y l’AD Cuasacas (Asturies), llevando yá cuatro sifones superaos y más de 900 m. de desendolcu.

> Avance de les esploraciones na Cueva l’Arquera (SEB Escar).