Axuntámonos… ¿axúnteste?

VI Axuntanza d'Espeleólogos Asturianos. Villanueva de Santu Adrianu, 19-21 de payares de 2010. Semeya: Rafa Bernardo

La VI Axuntanza d’Espeleólogos Asturianos, axuntó esti fin de selmana del 19 al 21 de payares en Villanueva (Santu Adrianu) a la mayor parte los clubes d’espeleoloxía asturianos, col envís de poner en común los sos trabayos d’esploración.

Esti añu la organización foi cosa del GE Diañu  Burlón y l’AD Cuasacas, andechando nello L’Esperteyu Cavernícola Espeleo-Club, el GE Polifemo, el GE Gorfolí, la SEB Escar, y el recién constituyíu CE El Raigusu.  Nesta edición, amás, andecharon con nós collacios del GE Niphargus (Burgos), SIS del CE de Terrassa (Catalunya) y del Cave Diving Group (Gran Bretaña), asistiendo miembros de la Facultá de Xeoloxía de la Universidá d’Uviéu, l’Instituto Geológico y Minero de España (IGME) el Presidente de la Federación Cántabra de Espeleología (FCE) y el Director del Parque natural de las Ubiñas-La Mesa, a los qu’agradecemos fondamente la so presencia.

Con una organización de primera, mui d’emponderar y d’agradecer a diaños y cuasacos -a bona parte con ellos!…-, l’asistencia a les presentaciones foi tou un ésitu. Con momentos punta d’un centenar d’asistentes, la sala cedida pol Ayuntamientu de Santu Adrianu nel Centru d’Empreses Villa Teunolóxica El Sabil, en Villanueva cásique mos queda pequeña!. Gracies fonderes al so Alcalde, D. Carlos de Llanos González. Agradecer tamién el bon tratu, la paciencia y el ciñu que mos brindaren tolos trabayadores del albergue El Sabil y tamién al Muséu Etnográficu de Quirós la prestosa visita del domingu pela mañana.

Quedamos toos n’atopamos pa la prósima Axuntanza, que será organizada polos collacios del GE Polifemo.

Como dexa afitao el collaciu Pablo Solares (SEB Escar), “la filosofía que mos venceya a tolos clubes de l’Axuntanza, y la visión qu’impulsa estos alcuentros, ye la espeleoloxía entendida como esploración y conocencia del mediu soterrañu. Una visión dafecho opuesta a otres visiones d’esta disciplina que miren de camudala nuna actividá sólo deportiva ya, incluso, competitiva. Así, esta Axuntanza añal d’espeleólogos asturianos ye un foru públicu nel que mostrar que n’Asturies añu tres d’añu esplórense cueves y torques nunca anantia conocíes, y el puntu d’alcuentru au poner en común les esploraciones feches. Tres de seis ediciones, la esperiencia de les Axuntances amuesa tamién que les grandes esploraciones necesiten de la collaboración de persones y equipos estremaos, y qu’esti alcuentru facilita los contactos y la puesta en marcha de proyectos en común. Esti bien pudiere ser el lema de l’Axuntanza: esploración, non deporte; collaboración, non competición”.

> La noticia, en La Nueva España.

> Más info y semeyes nes cróniques d’esta VI Axuntanza, vista polos collacios del AD Cuasacas, del GE Diañu Burlón, del CE El Raigusu, de la SEB Escar y de Pablo Solares (SEB Escar) en Montaña-Montaña (gracies al so director Andrés de la Torre pol interés nel eventu!).

> Y les semeyes de Santi, equí.

Esta entrada fue publicada en Les anuncies. Guarda el enlace permanente.

Una respuesta a Axuntámonos… ¿axúnteste?

  1. Berto Xuan dice:

    Norabona pola axuntanza, poles charres y sobretou pol bon ambiente del que pude esfrutar na tarde del sábadu.

    Un abrazu

Deja un comentario

Tu dirección de correo electrónico no será publicada. Los campos necesarios están marcados *

*

Puedes usar las siguientes etiquetas y atributos HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>