Les Anuncies – www.espeleoastur.as

Los collacios de la SEB Escar (Llanes) tan acabante asoleyar la memoria la campaña d’esploración 2011 na zona la Peñe Villa, la Peñe Llabres y el Picu los Resquilones (Llanes), que podéis consultar, imprimir y/o descargar dende Scribd picando equí.

Nesta campaña andecharon espeleólogos d’estremaos clubes: SEB Escar, GE Gorfolí, AD Cuasacas (Asturies), GE Niphargus (Burgos), SE Lenar (Cantabria), GE Sil (lleón) y la GES de la SEM (Málaga).

Los principales resultaos algamáronse na Cueva l’Arquera, con cuatro sifones superaos y más de 900 m. de desendolcu y na Cueva Rufresnu. Amás incrementóse’l desendolcu topografiáu na Cueva’l Mazu, la Cueva la Zurra y la Rede d’Entrecuevas, esplorando y topografiando más d’una ventena d’otres pequeñes cavidaes na zona. ¡Bon trabayu, collacios!.

> Memoria Campaña d’Esploración Villa-Llabres 2011 (SEB Escar).

Al traviés del blogue de los collacios de la SEB Escar,  el collaciu Toni Pérez (GE Villacarrillo, Jaen) da anuncia de que l’araña Meta menardi, qu’aveza a colonizar l’interior de les cueves nes zones más averaes a la boca, fuera declarada “araña del añu” y especie cavernícola del añu 2012.
El Grupo Ibérico de Aracnología n’andecha col GEV entamen un proyeutu nel que los espeleólogos podemos participar, collaborando na investigación.

> Más información nel blogue de bioespeleoloxía del GEV, equí.

Nesti recién proyectu denomáu Camino de Ario,  dánse a conocer les esploraciones de los collacios del GE Polifemo (Uviéu) xunta otros collaboradores de dientro y fuera d’Asturies na so fastera de trabayu n’El Cornión (Picos d’Europa, Asturies). La nuesa norabona pola iniciativa y alantre cola esploración!.

> Camino de Ario.

Belén de Cueves 2011. GE Polifemo, L'Esperteyu y Asoc. Belenista de Xixón

Yá tan equí les Fiestes nadaliegues y como tolos años, los collacios del GE Polifemo (Uviéu) entamen el Belén de Cueves pal prósimu domingu 18 d’avientu, xunta l’Esperteyu Cavernícola Espeleo-Club (Xixón) y l’Asociación Belenista de Xixón. Esta actividá de calter lúdicu y pensada principalmente pa los neños, va facese esti añu na Cueva H.oulagua (Llanes) ya igual hasta apaez per allí Papá Noel con delles sorpreses!. Gracies, Santi!.

Espeleo Útil

La collacia Cantia Gutiérrez de l’AD Cuasacas, acaba presentar una nueva y potente ferramienta desendolcada con teunoloxía Google Sites que mira de facilitar el llabor de documentación espeleolóxica con una gran base de datos que simplifica y de qué manera andar a la gueta de bien d’informaciones y materiales rellacionaos cola nuesa actividá n’Internet. Potente, bien encadarmada, cenciella, completa y ampliable…  imprescindible y a Favoritos darréu. ¡Gracies, Cantia!

> Espeleo Útil

VII Axuntanza d'Espeleólogos Asturianos. El Campu (Casu-Asturies), 26 y 27 de payares de 2011

La VII Axuntanza d’ Espeleólogos Asturianos, celebróse los díes 26 y 27 de payares nel Centru d’Interpretación del Parque Natural de Redes n’El Campu (Casu-Asturies), entamada pol GE Polifemo d’Uviéu, cola collaboración de l’AD Cuasacas (Trubia-Uviéu), la SEB Escar (LLanes), el GE Diañu Burlón (Corvera), el GE Gorfolí (Avilés), L’Esperteyu Cavernícola Espeleo-Club (Xixón) y el CE El Raigusu (Llaviana).

Na revista Montaña Montaña hai una completa crónica d’esti prestosu alcuentru, que yá fai el séptimu d’una granible y bayurosa ristra d’ellos. Nesti archivu PDF, queda l’alcordanza d’ellos y de tolo que llevamos trabayao n’andecha, gracies al collaciu Javier Santa Eugenia, del Esperteyu Cavernícola Espeleo-Club.

Dende Espeleoastur, gracies fonderes a los collacios del GE Polifemo pol so trabayu; al Ayuntamientu de Casu y al so Alcalde, D. Tomás Cueria pola prestosa acoyida; a la Direición y al personal del Centru d’Interpretación del Parque Natural de Redes; al personal del Albergue Camín de Redes pola so simpatía, paciencia y prestosa cocina; al personal del Muséu de la Madera; a Marigel Álvarez, Quesera Mayor d’Asturies, de la Quesería Reciegos Agroturismu por caltener viva l’ayalga de cultura gastronómica que ye’l quesu casín; a la Conceyala de Cultura del Ayuntamientu de Llaviana, Dª. Mª Inés García Vega y al Presidente de la Federación Cántabra de Espeleología D. Juan Colina pola so presencia nos actos; a los Doctores D. Nemesio Heredia y Dª. Mónica Meléndez, investigadores del Instituto Geológico y Minero de España (IGME) poles sos valioses aportaciones; y ánimu a los collacios del GE El Raigusu de Llaviana, que van ser los encargaos de montar l’Axuntanza que vien… yá naguamos por ello!.

El que nunca tuvo en Casu
nin de Casu comió’l quesu
ye señal que nun faz casu
nin comió del meyor quesu

> Historia de les Axuntances. Javier Santa Eugenia (L’Esperteyu). PDF
> Crónica de la VII Axuntanza d’Espeleólogos Asturianos 2011
> La VII Axuntanza (SEB Escar)
> La VII Axuntanza (GE Diañu Burlón)
> La VII Axuntanza (AD Cuasacas)

Iñaki Aguirre, raqueru oficial del GE Gorfolí, cola so Yamaha FZR-600 "Folixa Astur" en NYC, tres de pasar pel llagu Baikal, Toronto y Florida

Nel altu de La Espina
conocí un pastor.
Hai yá mui bien d’años,
nel altu de La Espina,
au suañaba yo.

Falóme de L’Habana,
Los Ánxeles, Chicago
y de Nueva York (…)

“Neñu, el mundu ye pequeñu
si nun tienes corazón”
-dixo él- (…)

Nel altu de La Espina
conocí un pastor (…)

Falóme de La Veiga,
Oubona y Paniceiros,
Caeras y Busmión (…)

“Neñu, el mundu ye pergrande
si ye grande’l corazón”
-dixo él- (…)

Xuan Bello. Adaptación de Lisardo Lombardía pa Llan de Cubel

Iñaki Aguirre alies “Topalante”, honorable raqueru oficial del GE Gorfolí, acaba llegar a casa tres de dar la vuelta al mundu na so fiel Folixa Astur. Salió a dar una vueltina esti branu hasta’l Llagu Baikal en Rusia pero, una y bones ellí, tiró too p’alantre per ende cul.lá hasta Korea y, yá que taba, siguió p’América vía Toronto, Florida y New York. Ellí dexó descansando la so FZR-600 hasta l’añu qu’entra, a ver si sigue topalante al otru llau de la mar, hasta Ushuaia. A la espera de si s’anima a abrir un blogue pa contar tantes coses, entrín y non, nesti filu tenéis una auténtica aventura pa esfrutar: http://acurti.es/Qqv

Y pa corazón grande, el d’Iñaki. Dende Espeleoastur, un fuerte abrazu!.

La Federación d’Espeleoloxía del Principáu d’Asturies (FESPA) ta acabante asoleyar el nuevu impresu pa la solicitú de los permisos d’esploración espeleolóxica nel Parque Nacional de los Picos d’Europa, consensuáu cola FEE, la FCE, la FECyL y la propia Alministración del Parque, col aquel de facilita-yos esti trámite burocráticu obligatoriu a tolos espeleólogos que cada añu desenvuelven les sos campañes d’esploración nún de los macizos kársticos más importantes del mundu.

> Más info, equí.

L'espeleólogu Hugh St Lawrence asegura un pasu nel empate'l Sistema de los Tres Condaos. Semeya: Robert Shone

Consideráu abenayá el Santu Grial de la espeleoloxía británica, el llexendariu Sistema de los Tres Condados (112 Km -70 milles-. de desendolcu y -100 m. -300 pies- de fondura) conforma’l sistema soterrañu más estensu de Gran Bretaña y fuere a la fin empatáu esti domingu tres de más de 50 años d’esploraciones. El sistema empezó a esplorase en 1928, pero nun fuere hasta 1961 en que empezó a trabayase nelli de forma sistemático. Esti gran sistema kársticu desendólcase ente los condaos de Cumbria, Lancashire y Yorkshire. Bon trabayu y dende Espeleoastur la nuesa norabona a tolos que fixeron posible esti llogru. Nunca nun paréis d’esplorar!

Gracies, Teca!

> Más info, equí.

Llega la seronda y con ella l’Axuntanza!. Los collacios del G.E. Polifemo d’Uviéu entamen la organización de la mesma pa los díes 26 y 27 de payares en El Campu (Casu), nel Centru d’Interpretación del Parque Natural de Redes. A l’avezada presentación de los estremaos trabayos d’esploración desendolcaos mentantu esti añu, amestaráse la realización d’un taller de GIS p’aprender a ellaborar una tabla de datos xeoreferenciada de cueves y a proyectar les poligonales nuna base cartográfica y fotográfica y sobre’l modelu dixital d’elevaciones. ¡Vémonos!.

> Descarga equí en PDF el Programa.

VII Axuntanza d'Espeleólogos Asturianos. 26 y 27 de payares de 2011. Centru d'Interpretación del Parque Natural de Redes. El Campu (Casu)