El 2 d'Agostu de 2008 salimos por fin a la gueta del posible raque avilesín. Esta vegada vamos Poli, Angel y Teca nel Petón baxu'l mandu del Capitán Bernardo. Tres más d'una hora de navegación y d'una gueta de media hora pa llargar el fondéu nel llugar más afayadizu, saltamos al agua. La ilusión por atopar un raque nes cercanies d'Avilés ye grande, cuanto más que delles referencies orales aseguren la pérdida d'un barcu grande n'estes agües. Tamién ye grande'l desencantu cuando llegamos a lo fondero a 48 m. y atopamos una gran formación rocosa que dende equí xube dica los 37 m. de fondura.

Esta peñona ta afuracada per delles cueves onde abunda'l pescao y el mariscu. L'agua veyao y l'ambiente solombriegu nun dexa más que unos 5 m. de visibilidá con lo que, tres 25 minutos de fondo, al tornar nun atopamos el fondeu, asina que llargamos una boya a superficie pa entamar la xubida y facer la deco al debalu. La mecedura de fondu foi una vegada más TX21/35 con oxi pa la deco a partir de 6 m.

Díes dempués nel chigre "El Puertu", en San Esteban de Bocamar, alcontré que nuna de les paredes del chigre hai enmarcada una carta náutica fechada en 1924 qu'abarca dende'l Cabu Peñes dica la Playa l'Aguilar. Nesta carta márcase nunes cordenaes averaes al llugar onde merguyamos una fondura de 16 (entiendo que braces) y xunto a la marca un nome: El Baxu Agüín. Un exemplu más de como l'escaezu va tomando cada vegada los resclavos d'una cultura milenaria como l'asturiana. Cada topónimu que se tresmana, cada pallabra que s'escaez, ye una celeridá más rápida de la cayida a unes escures fondures más prietes que la nueche eterna del fondu del nuesu Cantábricu.

Agora yá tenemos claro que nes cordenaes 43 37485 N 05 58 836 O nun hai un raque. Hai una piedrona que guarda nella, de xuru, el secretu de munches dómines de pesca.