los Güeyos de la Texa

El Pozo Azul

3.810 m de conductu somorguiáu

Por: Roberto F. García

Torna: Xosé Lluis del Río (GE Gorfolí - Asturies)

pica nes semeyes pa veles más grandes

El manantial del Pozo Azul allúgase na localidá burgalesa de Covanera. Les sos primeres esploraciones remóntense a la década de 1960. Dende l’añu 2001, el británicu Jason Mallinson garra la iniciativa principal na esploración d’esti manaderu que vierte les sos agües al ríu Rudrón. Jason lleva esploraos 2.810 m de conductu somorguiáu, merguyando a una fondura d’ente 65 y 70 m y la galería continúa...

Cronoloxía de les esploraciones dende 1964 a 2004

Añu 1964:

Nel mes de payares, los miembros del Serviciu d’Investigaciones Espeleolóxiques de Burgos, Joaquín y Pedro Plana, faen les primeres inmersiones esplorando 120 m/ -28 m.

Añu 1966:

Joaquín Plana percuerre 200 m, batiendo’l récord mundial d’espeleoloxía soacuática, que dende 1960 ostentaba’l ríu soterrañu del Garraff (Barcelona) au s’algamaron los 180 m.

En www.espeleosub.blogspot.com, recuéyese una recopilación hestórica d’estes inmersiones de los años 60.

Añu 1978:

Tres d’un paréntesis de 12 años, la Seición d’Espeleomerguyu de Club STD (Madrid) fai les sos primeres incursiones nel Pozo Azul.

José Medina y Carlos Ruiz foron los primeros n’abrir una serie inmersiones y, magar que cuenten con medios materiales llimitaos, son quién pa percorrer 500 m. de distancia nel primer sifón.

Añu 1979:

Los buzos del STD, con equipamientu nuevu, siguen coles esploraciones y, per mayu, tres de percorrer un total de 698 m. de conductu dafechu somorguiáu, los espeleomerguyadores salen a una galería de 300 m., que fue bautizada como "La Burbuja". Esti conductu aeriu terminará nún nuevu sifón. Mentantu esti añu, llevántase’l planu topográficu de la cavidá fasta’l segundu sifón.

Añu 1981:

El STD fai la so primer incursión nel segundu sifón, siendo quiénes p’avanzar 70 m., aportando a una fondura de –27 m. Nestes inmersiones participen Carlos Linares, Juan García Dionisio, José Bedoya, Fernando de Fuentes y Carmen Portilla.

Añu 1982:

N’agostu faise una campaña de 15 díes y son quién pa esplorar 180 m. del segundu sifón.

Añu 1983:

Pela seronda d’esti añu y aprovechando dellos fines de selmana, merguyadores del STD faen delles incursiones cola fin de seguir esplorando’l segundu sifón, dexando la punta a 320 m.

Añu 1988:

A partir d’esti añu, el G.E. Gaia de Madrid, formáu polos antiguos miembros del STD, sigue cola esploración. Aidaos por torpedos pa seguir esplorando’l segundu sifón, aporten a los 390 m. y algamen los 34 m. de fondura.

Añu 1989:

Viendo la dificultá qu’entraña seguir cola esploración, los espeleomerguyadores del G.E. Gaia cambien el plantegamientu les inmersiones y, aprovechando nuevos buzos y contando con aperios más sofisticaos, aporten a los 600 m / -37 m.

Añu 1991:

Esti va ser l’últimu añu que los miembros del G.E. Gaia seguiríen avanzando pel segundu sifón. Les espediciones fainse en fines de selmana, mentantu tres meses consecutivos, lo que conlleva un avance de 780 m. con un desnivel de -39 m. Con estos resultaos, el Pozo Azul algama un desendolcu total de 1780 m., repartíos en tres tramos: 1^er Sifón, 700 m./ -20 m; Burbuya, 300 m.; y 2^u Sifón, 780 m./ -39 m.

Al tiempu, Rupert Skorupka del Cave Diving Group of Great Britain (C.D.G.), contauta con esta cavidá, lo que supón la entrada n’escena los espeleomerguyadores británicos. Rupert fála-y a Jason Mallinson del Pozo Azul y ésti, amuésase interesáu nel manantial burgalés.

Años 1994-2000:

Mentantu estos años, Alfonso Antxía fai delles inmersiones nesta cavidá ensin incrementar los resultados algamaos pol G.E. Gaia en 1991.

Añu 2001:

Una década tendrá que trescurrir pa que se reanuden les esploraciones nel Pozo Azul y, esta vez, serán los británicos del Cave Diving Group quienes, equipaos con circuitos cerrados de respiración -rebreathers-, tomen la iniciativa de seguir esplorando’l 2^u Sifón.

En setiembre, los espelomerguyadores británicos Jason Mallinson y Rupert Skorupka, miembros del Cave Diving Group, cola información d’anteriores esploraciones nel Pozo Azul y aidaos en superficie por Julie Skorupka y Ann Mitcheli, faen una serie d’inmersiones.

En tres inmersiones, Mallinson instala dende’l puntu au aportaron los merguyadores del G.E. Gaia nel 2^u Sifón, tres tramos de 110 m, 140 m y 30 m.

J. Mallinson, comenta nel Boletín nº 142 del C.D.G., qu’avanzó ensin filu guía nel último tramu del 2^u sifón unos 190 m, sigún información obtenida nel website, www.espeleoastur.as, polo cual la punta de Jason allúgase en 1250 m /-50 m.

Añu 2004:

A mediaos de mayu, los británicos Jason Mallinson y Rupert Skorupka siguen cola esploración del 2^u Sifón del Pozo Azul. Tres delles inmersiones preparatories pa un nuevu ataque, Jason ye quién p’avanzar col so rebreather (Inspiration) 270 m. más. Con esti nuevu avance, el desendolcu del 2^u Sifón ye de 2.220 m, y la fondura ye de -70 m. El tiempu de la inmersión foi de 290 minutos, de los cualos Jason emplegó 120 minutos en percorrer esti 2^u Sifón (60 minutos en cada tramu) y 170 minutos destinólos a la descompresión, utilizando un ordenador de merguyu multimedia VR3 con opción de pasar a Circuitu Abiertu en casu necesidá. Tamién disponía de tables d’emerxencia calculaes col programa XS y dos botelles de 20 litros, una con Aire y otra con Trimix 17/30.XS.

Nueva punta de Jason Mallinson

El colectivu formáu polos buceadores Álvaro Subiñas, Xesús Manteca, Javier Lussarreta, Oscar Cuadrado, Ruben Tabeada, Lolo Jiménez, Jorge Lopera, David Peréz, Alfonso Machin, Isidro Baides, Luis Ochoa, xunta Jason Mallinson y Rupert Skorupka, entamarán col llabor de facer una nueva topografía la cavidá, más completa y precisa.

El llabor d’esti equipu hispanu-británicu ye muncho bien trebeyosu, al tener que facer abondes mediciones y toma de rumbos, teniendo de dibuxar amás so l’agua les seiciones y perfiles. Mirando d’algamar la mayor exactitú, toles midíes fainse con cinta métrica; asina ye qu’esti trabayu conlleva llargos tiempos d’inmersión.

En fines de selmana, los estremaos miembros del equipu desplácense dende diferentes puntos de la Península pa esti fin. Fasta agora, yá ta llevantada la topografía completa’l 1^er Sifón, de la “Burbuya” (zona áeria) y de 350 m. del 2^u Sifón, esto último un trabayu fechu por Rupert.

A partir de ahora la actividad se centra en seguir con el plano del 2º Sifón.

Pa procesar los datos recoyíos, l’equipu mándase del programa de topografía SURVEX, que mos muestra la cavidá d’una manera tridimensional.

La superposición de la planta sobre mapes topográficos del esterior, va indicando la direición de les galeríes y per ónde se desendolquen pel subsuelu’l páramu de Masa.

Al tiempu, y cola fin d’esparexar la nueva punta que Jason Mallinson, l’equipu español instaló un cable d’aceru nel tramu aeriu, cola sida d’usalu a mou de tirolina y treslladar el pesáu material que s’utilizará pa seguir cola esploración y topografía del 2^u Sifón.

Nel mes de mayu de 2006 y nuna espedición de diez díes, Jason Mallinson siguió avanzando pel 2^u Sifón. Jason primero instaló l’hábitat yá usáu nel añu 2004 a 7,5 m. de fondura, depués y col sofitu los sos collacios Álvaro Subiñas, Josep Guarro, Jorge Lopera y David Pérez, metieron fasta la cabecera’l 2^u Sifón tol equipu necesariu pa la nueva punta de Jason Mallinson, llabor que duró varies xornaes de trabayu.

El día la punta.

El domingu 28 de mayu ye’l día señaláu pa facer la punta. Ta too esparexao, Jason Mallinson llevántase ceo y, a les 9 AM, somórguiase nel llaguiellu d’entrada. En poco más de 12 minutos, aporta a la galería aeria. Tol material ta esparexao a la entrada’l 2^u Sifón, un torpedu llargu con una autonomía de 5 kilómetros y otru curtiu va ser los encargaos de propulsalu.

A les 2:30 PM, los buzos Jorge Lopera, David Diez y Alvaro Subiñas entren a la cavidá pa contautar con Jason mentantu ta faciendo la descompresión correspondiente, a sólo 30 m nel 2^u Sifón. David lléva-y un té caldo a Jason, que ta a pique d’entrar nel hábitat; una pizarrina va ser el mediu comunicación ente ellos.

Fuera, el restu l’equipu espera sollerte y los merguyadores d’apoyu dan la bona anuncia. La espedición ta siendo tou un éxitu, Jason Mallinson ta bien y foi quién pa’vanzar 590 m más y aportar a los 2.810 m.

A las 9 PM Jason, regresa a superficie, too salió sigún lo previsto.

Un nuevu éxitu y récord de Jason Mallinson y el so equipu.

Los resultados que Jason Mallinson ta consiguiendo a lo llargo les sos estremaes incursiones nel Pozo Azul, asitien esta cavidá somorguiada nel ránking les diez más importantes a nivel mundial. Anguaño, tien un desendolcu de 3.810 m, repartíu nún primer sifón de 700 m, un tramu galería aeria de 300 m, y un 2^u Sifón de 2.810 m.

Mentantu estos nuevos 590 m d’ampliu conductu que Jason percorrió, la seición supera los 10 m x 6 m. El suelu ye de sable fino y grava, y hasta agora’l conductu nun bifurca.

Jason, col so torpedu Aquazepp de 2 m de llargor y 100 Kg. de peso, adaptáu por elli mesmu pa tener mayor autonomía, merguyó a una fondura d’ente 65 y 70 m.

Estos resultados nun foran dables ensin l’usu del circuitu cerráu de respiración (rebreather) el cual proporciona al buzu una grande autonomía de respiración so l’agua y foi tamién usáu por dellos de los merguyadores d’apoyu. L’usu de mezcles d’estremaos gases (heliu, osíxenu y nitróxenu) ye esencial pa combatir la narcosis y baxar los yá llargos tiempos de descompresión. Tres torpedos arrastráronlu nel so percorríu, y un traxe secu con delles capes de ropa térmico aisláronlu de les fríes agües que lleguen a los 11º de temperatura.

Ensin duldes, la mayor dificultá que Jason atopa nesta esploración ye’l tiempu de descompresión. Nueve hores emplegó Jason Mallinson nel 2^u Sifón, de les cuales 6 h. tuvo paráu faciendo la correspondiente deco ente los -13 m y -7,5 m, la mayor parte d’esti tiempu muertu metíu nel hábitat (caxón de plásticu que nun pasa del metru cúbicu) que-y sirve de campana de descompresión.

Elli sólo llega a sacar la cabeza, les manes y parte’l troncu nesta cámara d’aire artificial, mentantu mira d’acomodase como ye bien a ello, sofitándose nunes cuerdes que-y valen d’asientu.

Un total de 12 hores foren necesaries pa que Jason Mallinson aportare a los 3.820 m de percorríu nel 2^u Sifón y salir a superficie.

Too un gran méritu y más si tenemos en cuenta que naide nun patrocina a esti espeleomerguyador de 38 años d’edá, y 20 años de esperiencia, nin tampoco al so equipu. Un deporte caru qu’aporta la so parte de conocencia científica, aidando a desvelar el percorríu soterrañu de les agües del Pozo Azul.

El sifón sigue, y l’equipu sigue trabayando na topografía y nos preparativos pa una nueva punta, quiciabes esta seronda, pero esta vez van facer falta más medios, más material y un nuevu hábitat; o mirar d’esparexar un mecanismo que permita utilizar el yá esistente a estremaes fondures, pero esto va ser otra aventura…

Ye d’agradecer l’ayuda prestada por Juan Carlos Lagunas (Bar Las Muñecas - Covanera), qu’un año más, prestó la infraestructura necesario p’acampar, cargar les bateríes, les botelles etc.

Más información en: www.espeleosub.blogspot.com