El mes de xineru de 1986 foi una prieta dómina pa los mercantes na mar asturiana. En pocos dies tresmanáronse el «Luchana», el «Castillo de Salas», el «Stanley Bay», amás de dos pesqueros que foron a pique nes cercaníes de Llanes, pola mor del mal tiempu.

Una de les hipótesis del naufraxu del «Luchana» foi, al igual que nel casu'l pernomáu «Prestige», los puntos débiles que se producen nuna estructura cuando s'entemecen aceros nuevos con aceros avieyaos. La resquiebra atribuyóse a la derivación d'esfuerzos na estructura'l buque, provocada por una gran reparación na que se incorporaron a la vieya estructura, partes d'acero nuevo. El «Luchana» naufragó el 15 de xineru de 1986, con un tripulante muertu y tres desparecíos.

Díes dempués, dos marineros fallecieron y uno despareció nel fundimientu del cargueru británicu «Stanley Bay», a unes ocho milles al norte del Cau de Peñes (Asturies), nún llugar averáu a onde naufragó el día 15 el «Luchana». Dos pesqueros asturianos naufragaron también na mesma selmana, frente a la costa de Llanes, a causa'l mal tiempu. Los tripulantes de les dos embarcaciones fueron rescataos. Xunto col «Castillo de Salas», fueron seis los accidentes graves ocurríos na mariña asturiana nel entamu d'aquel añu 1986. Parte'l carbón almacenáu nes bodegues d'esti buque, entamó darréu a espardese pela mar.