El buque de bandera croata «Neretva», cargáu con 5.492 tonelaes de cenices de pirita procedente de Bilbao, fundió nes cercaníes de Ribeseya (Asturies), el 13 d'agostu de 1992. Esti barcu, de 3.743 tonelaes de rexistru brutu, 106 m. d'eslora y 16,5 de manga, foi construyíu nel añu 1979, nos estelleiros de K.K.Taihei Kogyo-Akitsu, saliendo de grades col nome de "Kentari Nº 4", pa cambiar de naviera en 1981 y recibir el so nueu nome de "Balsa III". En 1985 foi mercau pola naviera croata Splitska Plovidba, de Split, que rebautízalu por fin col so caberu nome.

Matriculáu en Split (Croacia), tenía dos fermoses bodegues a proa. Ciudadela amplia a popa, cuatro puntales, obra muerta pintada de prieto y la obra viva de color encarnao carena. La chimenea espigada y azul llucía a los llaos la contraseña la compañía naviera.

Agora el «Neretva» xaz pa siempre a 26 braces de fondura, en fondu de sable, cerca del cantil, onde la mar rompe cuando ta fuerte, echáu enriba la banda d'estribor cumpliendo el so caberu fin d'arrecife natural, nel que cientos de peixes gueten, ente cabines y casamates, ente cámara de máquines y pañoles, abellugu de palangres y tresmallos.