Cueva'l Monte'l Patín
Textu y semeyes: Xesús F. Manteca (GE Gorfolí –Asturies)
La Cueva'l Monte'l Patín allúgase nel Conceyu Casu, dientro del Parque Natural de Redes. El llugar más averáu ye l'aldega piloñesa de Rifabar. Foi esplorada dica'l sifón temporiegu a finales de los años 70 polos miembros de la Seición d'Espeleoloxía del Club Alpino de Xixón, Carlos Ulecia, Toño Barrientos y Xuacu Menéndez.
Allugola Teca na seronda de 2004 tando a la gueta de fontanes marcaos nes fueyes del MTNP. Pa la so esploración y pa poder llegar colos nuesos coches dica les sos cercaníes foi necesariu solicitar un permisu a la Direición del Parque Natural de Redes.
El 5 de Xunu 2005, Isidro, Iñaqui y Teca topografíen dende la entrada dica'l sifón.
El 27 d'Agostu de 2005 alcontramos esti sifón camudau nún duck.
Tres d'elli, unes decenes de metros empobínenos a la poza d'un nuevu sifón.
Isidro, sofitáu por Juanjo Barajas y Teca -mentantu Iñaqui, Delri, Yago ya
Irene topografíen esti cachu de galería-, merguya el sifón y atopa una nueva
galería aeria seguida d'un nuevu sifón.
El 3 de Setiembre de 2005 Javier y Teca, sofitaos per Juanjín, Delri ya Irene, topografíen les galeríes ente sifones y esploren el tercer sifón dica 17 m. de fondura.
El 12 d'Abril de 2008, gracies a la nieve y la lluvia cayida dempués, foi fácil allugar el llugar per onde surden les agües del ríu soterrañu de la Cueva'l Monte'l Patín. L'agua surde casi na vertical de la boca la cueva pero unos pocos metros ríu abaxu. Ye impenetrable, magar que na terraza fluvial fecha nos argayos de la fastera vense dellos furacos que nun parecen tener continuación.
La Cueva'l Monte'l Patín
Teca, na entrada la cueva
Porteo
Carretando'l material
Primer sifón temporiegu (duck)
Javier Lusarreta, preparándose pa merguyar
Entrando al sifón
Teca: más fondo
Delri, na galería somorguiada del duck
Saliendo
La surdencia la cueva
