Memoria de la Espedición FFESSM-Ensame Aguarón

Picos d’Europa 2004 (Asturies)

Torna: Xesús F. Manteca (GE Gorfolí - Asturies)

Espedición organizada pola COMMISSION RÉGIONALE DE PLONGÉE SOUTERRAINE LANGUEDOC-ROUSSILLON MIDI–PYRÉNÉES de la FÉDÉRATION FRANCAISE D’ÉTUDES ET DE SPORTS SOUS-MARINS (F.F.E.S.S.M.)

Patrocinada pola FÉDÉRATION FRANCAISE DE SPÉLÉOLOGIE (F.F.S.) col númberu 22/2004 ya pola UNION BELGE DE SPÉLÉOLOGIE (U.B.S.)

ya’l grupu d’espeleoloxia asturianu G.E. GORFOLÍ-ENSAME AGUARÓN. Per parte asturiana nun hay sofitu dalu, nin puta falta que fai.

Fonte Obaya. Galería Aconeyante

ANDECHIEGOS (Per orde alfabéticu)

Ramón Obeso Amado

Juan José Alonso (Xuan Pelos)

Isidro Baides

Irene Barajas Eberle

Juan José Barajas Eberle

Martín Burgui

André-Marie Dawagne (Dédé)

Denis Grammont

Josep Guarro

Eric Julien

Nadir Lasson

Xosé Lluis del Rio Fernandez

Javier Lusarreta

Jean-François Manil (Boubou)

Xesús F. Manteca (Teca)

Oscár Cuadrado

Kino Passevant

Mathias Rosello

Cristina San Juan

Francisco Solís Gonzalez

Guillaume Tixier (Kamasoutriste)

Marc Vandermeulen

Frank Vasseur

Damien Vignoles

Fonte Obaya. Galería de Xuan Pelos

>> ver nota y más semeyes

>> topografíes:

H.uenti d'Estragüeñas alzáu | planta
H.uenti l'Alisa alzáu | planta
Fonte Obaya alzáu | planta

Diariu de trabayu

Sábadu, 31 de Xunetu de 2004

H.uenti’l Cuélebre: (Guillaume,Frank, Teca ya Isidro).

Verificación del filu dica – 30 m.f. Comprobose qu’una importante capa de repla fino tapízalo too y que la estrenchura de -20 m.f. ta tapecía pel sable. Esto ye por mor, ensin dubia, de les xorrecíes de l’inviernu. Que te cerrao pel sable’n -20 m.f. obliga a pasar pel techu’l meandru onde habrá que facer tamién la deco. Magar d’eso, déxense les botelles de deco en -6 m.f y -16 m.f.

Frank:

2x7 ll. a 220 y 180 bar dica 60 bar 42 minutos (-33 m.f.)

“Verificación del equipu y dexar el carrete de punta y 4 kg. de llastre. El furacu sofrió una xorrecía recién que dexó basa fino nes parés y la visibilidá amenorgó enforma. El mió filu ta rotu en munchos sitios ente -6 m.f. y -15 m.f.. A -20 m.f. ta sapozáu nel sable y ye imposible desenterralu. El pasu fonderu, esploráu l’añu pasáu ta colmatáu pol sable yá impenetrable.

Depués de pasar pela galería cimera atopo l’otru cau del tapón de sable a -33 m.f., nel llugar ú el mio filu sal d’ente’l sable. Tres d’amarrar el carrete, la rampla de sable entama a argayar, llevantando pequeñes nubes de turbidez. L’argayu garra velocidá y entama a sapozame les aletes. Subo col carrete cuando’ l ñudu d’unión ya ta tapeciu pel sable. Llego a -28 y salgo llimpiando el mió filu.

Teca, Guillaume ya Isidro dexen les botelles a -16 m.f. y -6 m.f., yo abandono el material (carrete y plombos ) en -16 m.f. tamién.

Teca baxa dica -28 m.f. con ensin visibilidá dala.

A la vuelta, écho-y una güeyada a la campana, allimentada por agua termal dalgunos cm. perbaxu la superficie l’agua”.

Cueva la Redonda: (Damien,Nadir y Kino).

Carretamientu dica la entrada de 6x4 ll. y reequipamientu del pasamanos p’asegurar el pasu.

Domingu, 1 d’Agostu de 2004

Cueva la Redonda : (Ramón Obeso, Francisco Solís, Xosé Lluis del Rio, Irene Barajas, Juan José Barajas, Nadir, Kino, Damien).

Carretamientu de 2x9, 2x4, parafusa y preseos pa esguilar. Merguyu y verificación del filu, reequipamientu de los tombayos y carretamientu de 2x9 al segundu sifón. Esguilada nel afluente C 15. Descubrimiento d’un segundu afluente nel barullu costeros, parao enriba C 8. Destacar qu’alcontraronse delles fuelles nos afluentes y un cachu maera nel riu, asina como yerba nel filu del S 2.

H.uenti’l Cuélebre: ( Frank ya Isidro).

2x9 ll.240 bar-160 bar, 35 minutos, (-45 m.f.)

Frank:

“Baxada a -45 m.f. pa comprobar que’l filu ta entá rotu y tola galería ta tapizada de repla fino nes parés. Recoyida de too dende -45 m.f. dica ú ta Isidro, que m’espera en 15 m.f. y sacamos tol material del furacu ente los dos (11 botelles, carretes, plombos, yaesu…). Turbidez asegurao, más filu rotu, más paraes de deco nel techu’l meandru, son enforma bones razones pa nun arriesgase”.

Conclusión: el filu ta rotu en munchos sitios y l’agua pue veyase en cualquier momentu. La punta ta anulada dafechu.

H.uenti L’Alisa: (Mathias, Denis, Guillaume).

Carretamientu de 4x4 ll. y comprobación de la istalación. Too ta bien.

Fonte Obaya: (Oscár, Juanjo, Cristina y Teca).

Topografia dica’l S 1 y de tola parte aeria.

Aporten Boubou y Marc.

Llunes, 2 d’Agostu de 2004.

Fonte Obaya : (Juanjo, Javier, Oscár y Frank).

Merguyen Juanjo y Oscár, que topografien 70 m. Javier y Frank carreten 2x9, 2x18, 12 y 10 ll.

Cueva d’Estragüeñas: (Damien, Mathias y Nadir).

Reistalación del S1., carretamientu de 2x6 ll. al S2 pa Mathias. Mathias reistala 55 m. del S2 dica -15 m.f. Enantes salir carretase un 6 ll. y un 2x7 ll. dica’l S2 pa la prósima vegada.

H.uenti Obar: ( Marc, Boubou, Guigui, Denis y Kino)

Reistalación y topo del S1. Montaxe d’una escala a la salida del S1 y prosíguese la topo dica’l pie la esguilada. Boubou y Kino intenten algamar la galería cimera per dos víes estremaes pero ensin reultaos dalos. Déxase too nel llugar y salse baxo l’orbayu.

Pela tarde llega Dédé.

Martes, 3 ‘Agostu de 2004

Gueta nel valle’l Ríu Dobra: (Kino, Nadir y Marc).

Marc:

“Salida del campamentu alrodiu les 11 h., baxo una metereoloxia nada afayadiza. Llovió tola nuechi ya inda llueve esta mañana. Camudamos l’oxetivu programáu, que yera la Cueva La Redonda.

Dempués de tres cuartos d’hora de carretera, tamos al pie’l macizu. Aparcamos la furgoneta na pequeña central elléctrica (30 T 03351113 UTM 4787707) ú entama el GR 201 que sigue pel flancu’l cantil el calce’l Ríu Dobra.

Atacamos la subida. La pendiente ye razonable pero pronto camúdase’n pindia. El senderu ye prauticable pa los 4x4 dica una vieya presa abandonada que tranca’l ríu a media pendiente del macizu. Facemos un cortu descansu. La foz, nesti llugar, tien bien 80 m. de fondura y el ríu, tresformáu nún llagu, ye d’un guapu color verde esmeralda. La foz y el paisaxe en xeneral son ablucantes. Magar que’l cielu tea siempre tapeciu. … Continuamos la subida. Fainos falta una bona hora pa llegar al llugar llamáu “Dobra Seca”. Ye nes cercaníes d’esti sitiu que tenemos qu’atopar el nuesu oxetivu del día. Baxamos al calce’l ríu, secu nesti llugar. L’agua tresmánase 200 m. calce arriba ente los llerones de la foz y ñaz 100 m. más abaxu al pie d’un tombayu secu nesta ocasión. Dexamos les mochiles. Guetamos la boca, descrita como de 5x5, mentantu 2 bones hores. ¡En vanu¡. Remontamos el ríu más de 1 km. y dalgún de los sos afluentes ensin alcontrar res. Son les 15 h. Camentamos coyer les mochiles y probar suerte más p’abaxu. Separtámonos. Dexamos les mochiles al pie’l senderu y baxamos, pela biesca, la pindia rampla dica la foz per onde cuerre’l Ríu Dobra. La lluvia entama a cayer…

Ye Kino quien a la fin atopa la boca. Fai falta decir que con munchu trabayu y travesando una poza fondera y en porricu. Les dimensiones modestes de la surdencia nun tienen un res que ver cola descripción que tenemos. L’abertura de la galería d’entrada llega a los 2,5 m. d’altor. El nuestru caberu problema sedrá baxar a esti llugar, nel calce’l riu, porque la surdencia ta allugada na otra oriella. Dafechu, la rampla yá pindia camúdase per una parede a plombu de 6 ó 7 m. Una cuerda, trayida gayoleramente, vence dafechu esti caberu pilancu. Cruciamos el ríu y tamos nos costeros que zarren la surdencia. Son les 16’30 h.

Nadir equípase axudáu por Kino mentantu Marc va al sifón. Ta 70 ó 80 m. de l’entrada, al cau d’un conductu forzáu de 1,2 m. de diámetru que sigue a la pequeña sala d’entrada. El suelu ta enllenu piedres de llerón y sable gordo. L’entrada l’agua ye baxa pero afayadiza. La poza tien alredor de 1,5 m. de llau. L’agua ta llimpio y la repla parez ausente… Prometedor.

Nadir termina d’equipase. De sutrucu, siéntese un españíu. Ye la xunta d’una rotula d’un vieyu “Cyclon 5000“ que salió del so allugamientu. Faise una igua darréu. Llamentablemente, el so otru regulador, tamién victima de Murphy, anecia’n fugar daqué. Agora a Nadir présta-y ver qu’una de les sos llinternes vino prendida na mochila y agora nun furrula. Esto nun sedría ná si’l so focu principal nun refugara a prendese.

Magar d’estos problemes en xunto, y por mor de los pilancos pa llegar a esti sitiu fai falta facer un reconocimentu’l sifón. Animámoslu y Nadir métese nel agua. Ta fria. Depués de comprebar l’equipu somórguiase nel sifón. Torna menos de 2 minutos más sero. La salida’l sifón, alloñada sólo dalgunos metros, ta torgada por costeros de bon tamañu. Ye imposible de pasar, nin con un 2x4 a l’inglesa… Esti sifón nun ye más que la estrenchura que ha preceder al verdaderu sifón sigún la descripción. Visto l’altu nivel de l’agua, ésta ta somorguiada. Na exploración de 1982, la estrenchura taba seca. Hai d’esperar per otra grande seca.

Salimos de la cueva deceicionaos. Marc marca la surdencia col GPS y travesamos el rií (30 T 0336522 UTM 4784664). Queda subir al senderu. Kino sube’l primeru, esguila la pequeña paré aidándose de la cuerda y tira de les saques que-y pasamos. Animámoslu. La peripecia cabera: pasando-y la última saca, Kino resbaria y gárrase a un escayu providencial qu’evita cayer al calce’l riu, 8 m. más p’abaxu. La saca nun tien tanta suerte… sicasí, nun ruempe nada. El restu la subida sedrá muy deportiva, porque l’orbayu moyó la yerba alto qu’hai enriba la biesca y fai difícil subir pela pindia rampla dica’l GR. Ye una braera pista de patinaxe.

A la fin, a cuatro pates, y aidándonos con tolo que podemos, algamamos el senderu. Facemos un cortu descansu pa recuperar l’aliendu, arranchar les mochiles, beber daqué y entamamos el camín de vuelta. Aportamos a la furgoneta a les 19 h., depués de 7 h. de paséu pel ríu cargaos como mules. Una hora más sero tamos nel campamentu.”

Cueva d’Estragüeñas: (Guillaume, Damien, Mathias y Denis).

Merguyu del S2 por Damien. Avanza 55 m. dempués de la punta de Mathias pero párase nel techu d’una parte estrencha. Véyase l’agua pola repla’l techu y entama a embarrase dafecho esta parte. Fai la topo a la vuelta.

Déxase posar y Guillaume sigue 20 m. más per un llaminador.

Fonte Obaya: (Frank, Javier, Juanjo).

Puntes de Frank (2x9 ll. y 12 ll.) y de Javier (2x18 ll.). Istalación dafechu de la galería principal del sifón dica 240 m. y llimpieza del filu vieyu. 105 m. más, parada a -41 m.f., dempués d’un puntu baxu a -40 m.f. y un puntu altu a -17 m.f.

H.uenti Obar: (Boubou, Dédé).

Reconocimientu dica la esguilada de 10 m.

Miércoles, 4 d’Agostu de 2004.

Gueta de surdencies nel Ríu Seya: (Kino, Nadir, Damien).

Baxada pel ríu dende onde dexamos los coches pa dir a la Cueva la Redonda dica’l km. 136, R.A.S.

Fonte Obaya: (Guillaume, Denis, Javier, Juanjo, Frank y Oscár).

Carretamientu de botelles pa un merguyu trimix. Guillaume, Oscár y Denis baxen a -35 m.f. na galería llateral.

Gueta de cueves y surdencies nel valle Robellada (Onís): (Dédé, Boubou, Marc y Mathias).

Marc:

“Separtámonos pel valle. Percorrémoslu en tolos sentíos mentantu una hora. Darréu, xuntanza nel coche pa facer conceyu. ¿Conclusión? Nada, res de res.

Hai que rexistrar les pallabres de los participantes pa tener una idega d’esta salida que, ensin dubia dala, fai progresar la ciencia dellos metros:

-          “¿Nun t’abulta raro esta caliza?”

-          “Nun sé, pa mí que ye cuarcita.”

-          “Tamién me lo pintaba a min, pero ¡nun m’atrevia dicilo!”

Nesti intre aporta un tercer prospeutor que-yos entruga a los dos primeros:

-          “¿Nun vos paez que ye cuarcita tou esti valle?”.

Visto esto, terminamos la mañana en chigre”.

Gueta de surdencies nel calce baxu del Riu Casañu: (Dédé, Boubou y Mathias).

“Repuestos de la deceición de la mañana, repetimos la caza, esta vegada nún macizu caliar. El ríu, secu nesti llugar, ye prospeutáu alredor de 500 ó 600 m. Llamentablemente nun ufierta a los buscadores más que dalgunos regatos ensin interés.”

Xueves, 5 d’Agostu de 2005.

Fonte Obaya: (Guillaume, Nadir, Oscár, Cristina, Javier, Josep ya Isidro).

Javier merguya dica -46 m.f. y párase na base d’un pozu que sube. Guillaume y Nadir siguen na galería llateral de -35 m.f. La galería sube dica -32 m.f. y dixébrase en dos (shunt). Parada a -35 m.f. (2x9 ll., temperatura 11ºC).

Una galería estrencha ye vista nel fondu la poza del sifón temporiegu (¿agües abaxu?). Dempués de salir, mírase la surdencia, Fonte Santa, dica’l sifón.

Gueta de surdencies nel Riu Casañu agües arriba de La Molina y reconocimiento de la H.uenti los Brazos: (Mathias y Marc).

Oxetivu llocalizáu por Mathias na documentación. La surdencia foi visitada una sola vegada en 1970. La descripción fala d’una galería de 120 m. que da, per una parte al sifón, y pela otra a una chimenea ú nun se fizo esguilada dala.

Marc:

“Salida del campamentu a la fin de la mañana. L’aldega de La Molina ta a dalgunos minutos en coche dende’l camping. El llugar, que cuenta con una veintena de cases, ta asitiáu onde desemboca la garganta encaxada del Ríu Casañu. Dexamos el nuesu vehículu nel final de la carretera ú entama’l camín que percorre les orielles del ríu. Esti senderu yera antiguamente usáu polos pastores y los aldeganos como testimonien les muries que marquen el nuesu percorríu. Munches cueves y beiros tan reciclaos en cuadres pa la reciella. El GR, coles marques encarnaes, sigue la oriella manzorga dica una pequeña ponte de piedra. Fai falta entós seguir a la mandrecha na foz, ensin pasar la primer ponte. Llégase darréu a una segunda ponte d’hormigón, qu’esta vegada hay que pasar. Siguese entós la oriella drecha alredor de 1 km. Nesti llugar, una tercera ponte que precede a unes portielles en ruines, permite pasar a la oriella manzorga. Síguese agora la llenta subida’l ríu. Pasamos, 500 m. más lloñe, sobre una cabera ponte, rudimentaria, pues ta fecha de dos tueros y un poco cementu. Seguimos el cursu l’agua un km. travesando una biesca fayes. Atopamos a la fin la H.uenti los Brazos, que tombaya na oriella drecha del ríu. Fai falta agora pasar unos 20 m. más alló la mecedura les agües y facer una fácil esguilada de 5 ó 6 m. pa llegar a la boca la cueva fósil que ta enriba la surdencia (30 T 034379 UTM 4795184).

Satisfechos por esti descubrimientu, volvemos pel camín pa dir coyer el material dexáu nel coche. Llévanos 50 minutos de camín.

Tornamos a la cueva. Mathias equípase delantre la entrada mentantu Marc va reconocer el sifón.

Dende’l calce’l regatu, fai falta facer una resbariosa esguilada de 5 m. que permite poner el pié nuna parte más panda. Dende equí, esguílase la rampla de 45º que lleva a l’entrada propiamente dicha. La boca, en forma de lluna creciente, tien 3 m. d’altor. La cueva entama per una galería recta. Un furacu na parede izquierda da al esterior. Tres 15 m., llégase a una pequeña sala que fai un cruce. A la manzorga, una galería baxa lleva a una segunda entrada, perestrencha, que sal ente costeros. A la mandrecha, entama la galería principal formando un ángulu de 120º. Hai qu’esmucise per baxo unes concreiciones y aportar a una sala onde la cueva garra unes proporciones más importantes: ¡la bóveda despaez no escuro!. Esta sala ta nortiada sobre una falla vertical. Dalgunes concreiciones faen más afayadizu’l trayeutu. El suelu, de llerones davezu, ye dende equí concreicionáu en blanco dafecho. Una baxada de dalgunos metros llévanos al fondo la cueva onde los resclavos de xorrecíes son importantes: repla y dellos sedimentos. Nesti llugar, dos falles paraleles empobinen derecho al sifón. La de la drecha permite algamar un balcón enriba la poza de 5 m. d’altor y sigue per una corta estrechura en forma de bayoneta. Enantes de la parte estrencha entama una chimenea que sube más de 15 m.

El sifón desendólcase aprovechando una falla. La superficie la poza ye vagamente oval, fai 1,5 d’anchu por 10 m. de llargo. L’agua ye llimpio y parez fondo darréu. Una cuchiella rocosa corta’l sifón en dos a lo llargo.

Marc sal a buscar a Mathias que ya ta preparáu. Lleguen en pocos minutos al sifón, bastante escitaos. Mathias métese nel agua con un 2x3 al llombu. Merguya. Sigue la falla nun agua llimpio. Párase 10 m. más lloñe, a 2 ó 3 m. de fondura delantre un pasu estrenchu. Les paredes arímense y nun dexen más anchor que dalgunos palmos pa pasar. Darréu parez qu’enancha. Fai falta volver otra vegada. Marc aprovecha una pequeña posa pa facer delles semeyes de Mathias.

Sacamos el material. Al pasar atopamos delles galeríes paraleles ya intentamos dalgunes esguilaes. La cabera, averada a la entrada, permite, pel preciu d’una esguilada de 10 m., atopar un estrechu furacu que tres d’un curtiu arrastre da a la cabecera d’un P 10 imposible de baxar ensin cuerda. No fondero cuerre un pequeñu calce activu ensin rellación dala nin cola surdencia esterior nin col sifón, sigún les primeres costataciones. Fai falta tornar equí otra vegada.

Salimos de la cueva por fin pela tarde. Llavamos el material nel ríu y baxamos pel valle dica’l pueblu.

Va seguir”.

H.uenti l’Alisa: (Denis, Kino, Damien y Frank).

130 m. más d’avance; parada nún llagu tres del S4.

Vienres 6 d’Agostu de 2004.

Fonte Obaya: (Marc, Mathias, Damien, Frank, Javier, Teca, Isidro, Josep, Guillaume y Oscár).

Damien sigue la exploración de la galería llateral a la que-y ponemos, de mano, “Galería de los Juanjos”. Amesta 40 m. de filu. Para a -35 m.f., 217 m. dempués d’un pasu a -28 m.

Frank fai una punta na galería principal y tira 77 m., para a 347 m. (-52 m.f.) nuna galería que sube.

Na surdencia (Fonte Santa) topografíase la parte aéria dica’l sifón por parte de Guillaume y Oscár. Darréu, Guillaume merguya nel sifón. Tira 75 m. con un puntu baxu a -13 m.f. Torna ensin amarrar el cabu’l filu a nada por falta de gomes!!!. Fai la topo a la vuelta. Faise tamién la topo esterior ente Cueva Seca y Fonte Santa.

Cueva la Redonda: (Nadir, Dédé, Boubou, Denis y Kino).

Punta anulada por mor de la mala visibilidá (50 cm) debida a les lluvias de los díes anteriores.

Sábadu, 7 d’Agostu de 2004.

Llegada d’Eric pela tarde.

Fonte Obaya: (Oscár, Teca, Denis, Frank, Damien, Guillaume, Nadir).

Frank fai dalgunes fotos con Oscár. Denis baxa a -20 m. na galería principal y llueu percorre 150 m. de la Galería de los Juanjos. Teca intenta facer punta na mesma galería pero atáscase na estrenchura de -32 m.f.. Nun ye posible pasar per elli con 2x15. Amás, na estrenchura estrópiase’l botón d’inflar el traxe secu, quedando bloqueáu na posición d’abiertu. Desconeuta’l llatiguín, torna a la superficie y fai la deco cimblando de fríu por tar con poco aire nel traxe.

Damién tira cuando sal Teca con 2x9 ll. y una botella de 9 ll. pa dexar al entamu la estrenchura. Progresa 73 nueos metros. La galería ye una diaclasa entornada a 30º. Ye de seición afayadiza: 1,2 x 2 m. nes partes horizontales abiertes nos cruces de diaclases. Para a -18 m. f. por problemes de compensación. El conductu sigue subiendo en rampla. Fai la topo a la vuelta. Merguyu de 60 minutos con una deco de 15 minutos con O2 ( 2x9 ll. + 9 ll. + 5 ll. O2).

Guillaume y Nadir merguyen en Fonte Santa y xúntenla con Cueva Seca al traviés d’un sifón de 105 m.

H.uenti los Brazos: (Mathias, Dédé, Boubou, Kino, Marc).

Marc

“Tamos nel aparcaderu a les 10’30 y na cueva 50 minutos más sero. Facemos dos equipos: Marc carreta el 2x4 de Kino que va intentar el sifón. Mentantu, los otros tres faen la esguilada que da enriba’l P 10 y el pequeñu activu que s’acolumbró fay dos dies. Mathias aprovechará pa facer delles fotos. El segundu bibotella déxase a la entrada pa’l casu que Dédé tenga que merguyar tres de Kino si atopa la continuación ó n’otru sifón nel ríu paralelu.

Darréu salimos de dubies. El sifón principal ye impenetrable dempues de sólo 10 m. La falla sigue alta pero impenetrable. Dempués de 30 minutos de búsqueda ente 0 y -5 m., Kino nun puede alcontrar el pasu agües arriba. Na otra galería, báxase el P 10. Abaxu cuerre, como camentábamos, un pequeñu regatu. Surde d’una falla impenetrable agües arriba y despaez agües abaxu ente costeros. Un curtiu destorgamientu nun dexa avanzar. A la vuelta, Dédé, aseguráu por Mathias, fai una cabera esguilada na segunda sala. Esguila más de 15 m. pa ver que la falla sigue p’arriba 10 m. polo menos pero estrechándose. Una gran bayura de resclavos de cascoxos faen camentar que la falla tien de salir a la superficie.
Tol mundu sal decepcionáu del furacu mentantu Mathias y Marc faen la topo.”

Domingu, 8 d’Agostu de 2004.

Mathias, Guillaume y Denís marchen pela mañana ceo.

H.uenti Obar (pela mañana)/H.uensabeli (pela tarde): (Dédé, Boubou y Marc).

Marc:

“Vamos facer fotos somorguiaes nestes dos fontes. Llevamos dos carretes de 24 diapos. Magar de les difíciles condiciones meteorolóxiques y de les violentes turbonaes d’agua de la tarde d’ayeri, les dos fontes amuesen un agua claro y un caudal modestu. Como’l tiempu de reaición ye llargu (perllargu) camentamos que l’acuíferu ye perimportante por tener una capa impermeable más baxa (hay cuarcita averada) o les lluvies foron menos fuertes nes fasteres de sumición d’estes surdencies. A ver…

Col fin d’asegurar les bones rellaciones, tomamos café y dexamos le nuestres señes nel Hotel Juansabeli. Prometemos-yos enviar dalgunes fotos porque los nuesos predecesores paecen nun tener priesa.

Cuando salimos, llueve otra vuelta. Atalantamos azotar la toballa y dexar el paséu pela fastera cimera pa otru día.”

Fonte Obaya: (Frank, Eric, Kino, Damien, Nadir, Teca, Isidro y Martín).

Punta de Frank na galería llateral (Galería de Xuan Pelos). Percorre 50 m. de galeríes estreches y surde nuna campana. La galería torna a somorguiase dica -3 m. nun meandru estrechu y retortoriu. Eric acompángalu al dir dica -35 m.f. llevando-y un 2x9 ll. a la inglesa y otros dos 9 ll.

Kino, Nadir y Damien continuen la esguilada entamada l’añu pasau por Franón, Oscár y Teca. Dempués de 20 m. más d’esguilada la falla pieslla y nun se siente la corriente d’aire. Al desequipar Damien decátase d’un furacu no alto del primer tramu d’esguilada. Tres d’un rápidu destorgamientu tira 10 m. per un tínganu estrechu y párase nuna pequeña sala u tola corriente d’aire del furacu sal d’un duck... Mira de pasar n’apnea pero lo alto del pasu ye perestrechu y fai falta merguyar o esperar que’l nivel baxe. Esti duck parez tar penriba’l nivel del sifón.

Martín instala 20 m. na Galería’l Coneyu, dexándolo a 370 m. y -40 m.f. Desequipamientu y fin de les exploraciones per esti añu.

Llunes, 9 d’Agostu de 2004.

Dédé, Boubou y Marc marchen pa Bélxica pela mañana ceo.

Cueva la Redonda: (Frank, Kino, Nadir, Eric y Damien).

Desequipamientu ensin poder proseguir nesta cueva. Dos carretamientos pa Nadir y Frank de la cueva a la furgoneta. Recupérase el 2x9 y los preseos d’esguilada nel furacu per Eric, Kino y Damien.

Frank y Nadir marchen pa Francia pela tarde.

Martes, 10 d’Agostu de 2004.

H.uenti Obar: (Eric, Kino y Damien).

Eric merguya nel S 3. Para nuna estrechura infranqueable coles botelles al llombu pero que podríe agrandase con una maza. Damien pasa’l duck estrechu d’agües abaxu, pero déxalo al cau de 5 m. ente’l riesgu de facer tapón.

Esti final estrechu parez raru, nun afayadizu pa cola talla’l conductu forzáu qu’empobina’l sifón. Kino y Damien entamen entós la esguilada penriba’l sifón, onde s’acolumbra un furacu.

A la vuelta, esploración d’una sala concreicionada, seguida de la otra. Paez qu’esta sala ye de fechu un conductu d’alredor 8x7 m. colmatáu nos dos estremos. ¿Y si la esguilada diera n’esi mesmu conductu más p’alló?.

EPILÓGU

Miércoles, 11 d’Agostu de 2004.

H.uenti Obar: (Eric, Kino y Damien).

La continuación de la esguilada n’artificial ye más que prometedora. Una galería forzada de 2 a 3 m. de seición media lleva a una sala (alredor de 80x15 m.) onde aporten delles galeries. Seguimos explorando unos 500 ó 600 m. y parámonos embaxo un tombayón de 5 m. ú parez cuerrer tol ríu. A la vuelta agüeyamos dellos entamos de galeríes onde siéntense llonxanos dellos tombayones.

El nuesu topofil colos sos 200 m. de filu paeznos escosu ente la bayura de trabayu por facer. Salimos calientes nos nuesos neoprenos dempués d’esti carretamientu ente sifones.

Ye una gochada facer tal descubrimientu al final de la espedición, pero agora tamos enllenos d’esperanza y de motivaciones pa organizar “Picos 2005” más especialmente nesta cavidá.

Cueves esploraes

H.uenti d’Estragüeñas. Topo: alzáu | planta

Conceyu del Valle Bah.u de Peñamellera (Asturies).

X= 04º 36’ 09” Y= 43º 17’ 46” Z= 110 m.s.n.m.

Desendolcu : 515 m.

Allugamientu

4.800 m. agües arriba de Panes, na oriella derecha, na salida fondera de la foz de La Ermida. La boca fondera de la cavidá ta tapecida per una ponte so la carretera. L’agua surde darréu al ríu Deva.

Pueden aparcase los coches 400 m. más lloñe agües arriba, de l’otru llau del valle dempués d’una ponte sobre’l ríu Deva.

Hestoria

Conocía polos del llugar, esta cueva foi merguyada pol equipu de la S.S.S. Genéve (Cathy Loumont, André Pahud) y del G.S. Doubs (Dominique Bertin, Gérard Chorvot) en 1978, que avanza dica’l S 2 ensin atopar la continuación. N’Abril de 2001, el G.E. Gorfolí-Ensame Aguarón alcuentra el barullu costeros de la salida del S 1 permal sofitada y dexen la esploración dempues de la caída d’un costeru enriba’l merguyador (Teca).

N’Agostu de 2003, mentantu la espedición astur-francesa “Picos 2003” el S 1 ye pasáu otra vuelta. Dos reconocimientos posteriores (Nadir Lasson, Kino Passevant, Guillaume Texier, Damien Vignoles) permiten atopar el S 2 al final d’un camín trebeyosu.

N’Agostu de 2004 el mesmu equipu fai la esploración y la topo del S 2, asina como la esguilada penriba la poza.

Descripción.

De les dos entraes que tien la cueva, la más baxa ye la más afayadiza. Ábrese so la carretera. Una curtia galería trespasa un canal y sube nuna sala grande abierta pela entrada cimera. Un gran ensame d’esperteyos tien equí la so cubil.

El S 1 (31 m., -5 m.f.) entama nuna guapa poza allargada. La so seición amenorga pasu ente pasu enantes d’atopar un argayu del techu. La salida nun ye fácil d’alcontrar nel barullu costeros y ye enforma estrencha. Fai falta guiase pol ruidu’l regatu p’atopala. El camín tira peles partes altes (ta marcáu con fitos y gomes). Per dalgunos pasaxes pequeños y embarullaos, llégase a una sala. Na fastera cimera, una galería s’amuesa nortiada a la salida. Tien alredor de 30 m.

Fai falta entá seguir 80 m. enriba costeros pa descubrir el S 2, que s’anuncia per una poza de 7x3 m, perbaxu una galería que zarra darréu. El sifón entama per una rampla de sable dica’l altu d’un pozu a -12 m.f., aparentemente’l final de 1978. Una galería a la manzorga engóchase dempués de 20 m. adoutando un perfil de llaminador sableru con gran bayura de repla. La base’l pozu ta a 21 m.f. Darréu la galería sube a -10 m.f. Tres 105 m. faise una diaclasa entornada a 45 º. 10 m. más lloñe camudase n’un llaminador per estrechu, dexando la esploración a 120 m.

Karstoloxía

El caudal de branu ye de 10 ll/sg. Dellos depósitos orgánicos amuesen la posibilidá d’un sumidoriu averáu.

Temperatura de la surdencia: 11,5º C

Temperatura del Riu Deva: 19 º C.

Fonte Obaya. Topo: alzáu | planta

Gobiendes, Conceyu de Colunga.

X= 319.412 Y= 4.814.650 Z= 70 m.s.n.m.

Desendolcu: 1.140 m. topografiaos.

Hestoria

En 1995 los miembros del Grupu d’Espeleoloxia Gorfolí-Ensame Aguarón esploren dica -41 m. Les tres galeríes esploraes faen más de 300 m. de sifón.

El sábadu 9 d’Agostu de 2003, el G.E Gorfolí-Ensame Aguarón, aidaos nel carretamientu polos franchutes de “Picos 2003”, reequipen el sifón dica -35 m. y exploren dos galeríes llaterales que finen en dos campanes ensin continuación. Mentantu la espedición “Picos 2004” l’equipu astur-vascu-francés esplora 600 m. más nos conductos somorguiaos de la cueva.

Descripción

Una pindia canal sube dica la boca d’entrada, allugada nún cantil metanes la biesca. Una fácil esguilada da pasu a la primera sala. Baxando pal sudoeste, una afayadiza galería col suelu costeros llévanos a un llagu. El techu baxa faciendo un sifón temporiegu de 10 m. de llargor. Equí sopla un fuerte vientu, elementu estimulante tanto pa les prospeiciones esteriores como pa les esguilaes dientro la cueva. Tres d’esti pasu acuáticu, súbese per una rampla pindia dica una pequeña sala. Ye’l fondu d’un pozu a cuya cabecera llégase dende otra galería más llonxana. Equí entama una curtia rampla que fina na poza’l sifón.

Enriba la poza escomencipia la esguilada de 25 m. n’artificial dica una estrechura impenetrable ensin corriente d’aire. Na primera repisa, a 5 m. penriba’l sifón, hai una galería d’alredor de 25 m. Lleva a una pequeña sala con repla. Equí tola corriente d’aire parez venir d’un duck. L’espaciu ente l’agua y el techu nun ye enforma pa permitir pasar, asina que fai falta merguyar. Esta poza parez tar colgada. Podríe ser dable’l vaciala.

Tornando al nivel de l’agua, otra galería sube darréu al sudoeste nuna rede de galeríes más pequeñes dando acesu a dos poces más. La primera, nuna galeria que baxa, merguyóse 10 m. dica un pasu infranqueable. Tres la nuesa topografia vemos que pasa penriba’l sifón principal y nortiase n’otra direición. La segunda, la más llonxana de la poza’l sifón, tien de coneutar con elli, yá que vénse les burbuyes al pasu de los merguyadores. El sifón entama nuna poza con abondes formes d’erosión. Somórguiase darréu a -4 m.f., nortiándose al noroeste. Nesta fondura alcuéntrase una galería afayadiza (4x2,5 m.) qu’enfila’l sudoeste. Na oriella la manzorga, un furacu prollóngase agües abaxu pa surdir nuna sala comunicada (a voces) cola base del resalte siguiente al sifón temporiegu, y torna a somorguiase nuna resquiebra impenetrable agües arriba del sifón temporiegu. Agües arriba, el conductu, de seición irregular y atormentada, gana fondura per pequeños escalones seguíos dica -15 m.f. a 50 m. de la entrada. Una brutal subida empobínanos a -12, a un braeru cruceiru u s’amesten tres galeríes, dos d’elles les principales de la cavidá.

A la manzorga, una resquiebra afayadiza sigue una veintena de metros más lloñe a -2 m. (72 m. de la entrada). Termina de manera impenetrable baxo les galeries aéries.

Na mandrecha ábrese la galería Xuan Pelos, qu’entama per una resquiebra (anchu 1,3 m.) nortiada al suroeste. Baxa darreu a -35 m.f. (120 m. de la entrada del sifón) y dempués sube llixeramente a -33 m.f. con unes dimensiones más reducides (1,5x1,5 m.). Una pequeña galería ( 15 m.) cuerre al par cola mesma pendiente dica -28 m.f. (185 m.). El conductu xira darréu al sur a favor d’una potente resquiebra que lleva al segundu puntu baxu de -35 m.f. Fai falta agora escoyer el camín na estrechura de la fastera ascendente que s’anuncia entós. Nel suelu, les dimensiones son más afayadices, pero un apretón pon fin a l’avance. Fai falta entós alzase pa franquiar la estrencha subida (franquiada con 2x9 a la inglesa y un 9 ll. pa’l viaxe). Atópase darréu una seición más afayadiza, magar que más pequeña que la del entamu d’esta galería. Sube pasu ente pasu, magar que’l camín parez menos nidiu nel senu la resquiebra. A 234 m. tamos a -28 m.f., dempués a -12 m.f. en 280 m. Apretáu na galería cada vuelta más estrencha y nortiada al sur-sureste surde nuna campana, onde la parte aéria de la resquiebra prollóngase no alto de manera poco prometedora.

Pasando perbaxu unos costeros empotraos, báxase a -3 m.f. pa descubrir l’entamu d’un meandru estrechu y retortoriu, pero pasable con botelles más pequeñes a la inglesa. Tamos equí a 322 m. de la poza d’entrada del sifón.

Nel cruceiru, la galería principal impónse a la evidencia. Un grande conductu (3x4 m.) en forma pesllera baxa seliquino nortiáu al sur dica -40 m.f.. La canal de la pesllera desparez nel perfil d’un suelu piedruques, agora que la galería enánchase a más de 6 m., a 150 m. de la entrada.

Una veintena metros a esta fondura y fai falta escoyer ente les dos galeríes forzaes paraleles que se presenten. La de la mandrecha ye mas espaciosa y más direuta. Xúntense dempués al pie d’una resquiebra vertical que sube, u ta amarráu el puntu final de los merguyadores anteriores (Carmen Portilla y Fidel Molinero). La Chimenea del Puturrú (una bébora “viril” ufiertada a Oscár pel so suegru, de xuru pa comprebar que tien los coyones bien amarraos) sube darréu de -40 a -17 m.f. La bóveda ellévase pero a nivel del suelu entama un ablucante meandru somorguiau: La Galería’l Coneyu (evocador de les prestaciones sexuales d’Oscár). Tres un xiru al sureste, el conduútu gana n’envergadura (4x6 m.) ya inclínase de sutrucu. Baxa con abondos requexos dica 270 m. (-46 m.f.). Equí, un culusacu con prietes formes d’erosión ye de mal augurio. De magar, dellos metros agües abaxu y subiendo’n vertical, atópase una galería muncho más modesta (1,5x1,5 m.), desdoblada na parede de la manzorga nuna seición impenetrable. Ye la Galería Aconeyante.

Tres pasar un estrechamientu embarulláu, el puntu más altu (-36 m.f) corta  perpendicularmente una galería más grande (3x5 m.). Torna a baxar a -52 m.f. no alto d’una marmita cuyu fondu debe tar a -58 m.f. Pero la continuación ta penriba. Sube darréu dica atopar una galería onde la pendiente ye menos pindia. Anguañu la fin de les exploraciones ta a -40 m.f. (370 m.) por autonomía del gas y porque ye necesariu camentar cómo axustar el gas pa esti perfil ablucante.

Karstoloxía

Fonte Obaya ye la surdencia principal del Puertu Sueve na so fastera norte. Una resquiebra superpónse a la galería Xuan Pelos. El G.E. Gorfolí alcontró recién dos pozos nes cercaníes de Peña Llechial (950 m.s.n.m.) sobre esta fractura, pero que cierren a -12 y -25 m.f.

H.uenti l’Alisa. Topo: alzáu | planta

Canal Negra, El Cornión, Conceyu Cabrales.

X= 351,5 Y= 4794,6 Z= 160 m.s.n.m.

Desendolcu : 1.148 m. topografiaos más alredor de 150 non topografiaos.

Desnivel : 63 m. (-14, + 49)

Allugamientu

Na Canal Negra, en dirección a Ponte Poncebos, pasar el primer tínganu y seguir alredor de 2000 m. dica acolumbrar dende la carretera la surdencia na otra oriella del Ríu Cares. Éntrase na cueva per una boca fósil asitiada dos metros penriba la surdencia, un migayín agües arriba. Hai delles places un tanto rares p’aparcar un pocu más lloñe ríu arriba. La solución más simple ye baxar dafecho pel pedreru y travesar el Ríu Cares. Hai que cuntiar con una cuerda de 50 m. p’amarrar na bionda que bordea la carretera p’asegurar la baxada y axudar na subida.

Hestoria

Tres espediciones de la S.S.S, Genève (Cathy Loumont, André Pahud) y de G.S. Doub (Dominique Bertin y Gérard Chorvot) de 1978 a 1980 permiten avanzar les esploraciones dica 100 m. (-9 m.f.) nel segundu sifón dica parar la esploración por falta de filu.
Mentantu’l mes d’agostu de 2003, un equipu de la espedición astur-francesa “Picos 2003” (Oscár Cuadrado, Richard Huttler, Nadir Lasson, Laurent Mestre, Guillaume Tixier, Frank Vasseur, Damien Vignoles) prosigue la esploracion dica’l S 4 a 1.000 m. de la entrada, topografia la cavidá y fai un reportaxe fotográficu dende la entrada al S 3.
Al entamu d’agostu de 2004, l’equipu de la espedición “Picos 2004” (Denis Grammont, Kino Passevant, Mathias Rosello, Guillaume Tixier, Frank Vasseur, Damien Vignoles) pasa’l S 4 y esplora un gran llagu más alló. Mergúyase nel llagu dica -32 m.f.

Descripción

Una boca entornada permite’l pasu a una pequeña sala seguida d’un tubu de 17 m. dica’l primer sifón.

El S 1 (142m., -12 m.f.) ye afayadizu y sinuosu. Delles dunes de sable perfino y percande adornen el suelu y faen peratopadizu’l percorríu. Súrdese nun llau siguíu d’una galería ribayosa onde’l ríu soterrañu caracolea nuna guapa foz. Per un altu meandru acédese darréu a un tombayón de 3 m. Dellos metros p’alantre, un afluente na oriella manzorga sube per una guapa galería. Ye la parte aéria en cursu d’esploración polos nuesos collacios d’Asturies, anguañu remontaes dica +22 m.

Subiendo un escalón de 2 m. y faciendo una esguilada delantre esta galería alcuéntrase un furacu en techu concrecionáu que, tres d’un pozucu de 2 m. améstase al ríu penriba’l tombayón. Un llagu llargu poco fonderu col techu baxu, estírase mentantu unos 60 m. Una visera concreicionada remana esti paxase en tola so llargura. Algámase entós un meandru perguapu que fina nuna serie de dos tombayones (3 y 12 m.) seguíos de galeríes superiores estreches. No alto la vertical, un nichu rocosu lleva a una galería perpindia pa dar un grande conductu u’l ríu encáxase dafecho. El segundu sifón ta equí, alredor de 200 m. dende’l S 1. Penriba esti sifón esguilóse una chimenea dica + 44 m. El S 2 (232 m. / -20 m.f.), casu esceicional, dixébrase en tres partes morfolóxicamente perestremaes. Dellos metros dende la poza d’entrada, una rampla de sable fino casi zarra la galería escontra’l techu. Resbariando ente’l sable y la roca’l techu descúbrese una guapa galería. Unes galeríes de diámetru penriba los 4 m., unes dunes de sable cande… Un furacu nel techu rocosu pon la fin a esti primer cachu del sifón. Entama entós un tubu d’alredor 1,5 m. de diámetru que baxa puntualmente a -20 m.f. pa remontar darréu a -15 m.f. Dempués de 50 m. per esti conductu algamamos la estrenchura de “Los Principiantes”, de 2 m. de llargo que pásase a la exipcia. Entama entós el tercer y caberu cachu d’esti sifón, una grande resquiebra na que evoluciónase a mediu altor enantes de subir pasu ente pasu dica la poza salida. Continúa per un llagu que baña una sala onde’l techu llevántase más de veinte metros. Un canal escaváu presaxa los 180 m. de ríu a percorrer dica’l tercer sifón.

Fai falta agora pasar penriba un barullu costeros monumental pa progresar per una resquiebra. Les paredes son clares, dalgunes vegaes con venes de mármol cande, l’agua tresparente cuerre per un suelu inmaculáu, el conductu (2x2 m.) ye nesti llugar circular…l’éstasis.

Pasáu un curtiu estrechamientu ente costeros empotraos, algámase’l ríu onde’l suelu desparez pasu ente pasu dica nun facer pié. Llegamos entós a un tubu arcillosu amosáu penriba l’agua que lleva a la base d’una esguilada na resquiebra, estimada en unos 20 m.
El S 3 (73 m./ -15 m.f.) entama no fondero’l llagu, al nivel d’una saluca con sable con una chimenea na oriella de la manzorga, xusto enantes l’entamu’l tubu. La resquiebra baxa darréu a -7 m.f. y dempués a -14 m.f. Una subida puntual precede el puntu más baxu de -15 m.f. La resquiebra ellévase entós y fai una ancha sala onde’l suelu, con dunes de sable cande, ufierta un paisaxe llunar ablucante. Fai falta agora tornar so los sos pasos pa salir del sifón. Darréu el ruiu d’un tombayón d’agua anuncia nueves galeríes. Abórdense agora 116 m. de ríu per una serie de tombayones (7, 4 y 1 m.) que tiennen penriba 24 m. de grandes conductos fósiles empataos al ríu per un pozu de 5 m. Entama entós un tramu activu horizontal, torgáu por tres ducks. A la fin de la corriente d’agua topamos una resquiebra impenetrable, d’onde surde tol agua. Una esguilada de 4 m.seguida darréu d’una baxada estrencha na resquiebra, empobina otra vuelta al nivel del agua qu’anuncia el S 4.

Esta pesllera llíquida (24 m./ -6 m.f.) ye modesta (2x1,5) y mengua na subida a la salida. Surde nuna resquiebra activa (1,8x3) mentantu unos 20 m., enantes de desembocar nún llagu remanáu por bóvedes que se llevanten más de 15 m. Tamién podemos franquiar el S 4 per una esguilada. Dempués una galería corta l’alta resquiebra a más de 10 m. d’altor p’algamar el llagu tres el S 4. Dende la oriella acolúmbrase que’l llagu baxa tanto como sube’l techu.

Tres 52 m. de nalar, la oriella manzorga allárgase pa facer una guapa poza cuadrada. Nesti estremu un meandru impenetrable, tapizáu de repla prieta, dexa escapar una duce melodía de tombayón, alló, lloñe. Lo fondero’l llagu, nesti llugar ta colmatáu a -7 m. f. por costeronos tapecíos de basa fino y prieto que se llevanta fácil veyando l’agua. Tornando unos 15 m. pa la salida, nel llugar onde les parés s’estrenchen, merguyamos a -32 m.f. nuna fermosa resquiebra somorguiada (4 m. d’anchor en dalgunos llugares). Nesta fondura, la basa prieta baxa y veya l’agua. La falta de visibilidá y lo inadaptao del material de merguyu pa esta fondura nun permite seguir la esploración.

Karstoloxía

Esta surdencia ye la fonte cimera de la Xerra Cobros, asitiada al sur suroeste de Po de Cabrales. El picu cimeru ye’l Cuetu Cananda (1.058 m.s.n.m.). Pel sur la xerra ta llendada pel cumal de Las Coronas (1.212 m.s.n.m.). El caudal de branu ye d’alredor de 3 ll./segundu.