Cueva del Pozu l'Infiernu

 

Textu y semeyes: Xesús F. Manteca (GE Gorfolí –Asturies)

 

Nel añu 2004 el G.E. Gorfolí interesámonos pela continuación de la esploración d’esta surdencia asitiada en Vegacervera, Los Argüeyos (Lleón), relativamente cercana a Avilés y nuna tierra que préstanos asgaya como ye'l norte de Lleón. Munches vegaes tenemos falao de la posibilidá de retomar la esploración d'esta cueva, pero siempre surdió daqué que nos emburria a dexalo pa otru añu, y asina va pasando el tiempu. El pocu tiempu disponible fay que lu dediquemos a la esploración d’otres cavidaes y que aparcáramos esti proyeútu dica l’añu 2008. Esti añu parez que por fin  xuntáronse  les ganes de facer coses cola esistencia de meyores preseos pa facelo.

La Cueva del Pozu l'Infiernu ye una cueva que amesta les agües que surden d'ella al riu Toríu, na estrechura de les Foces de Vegacervera. Estes agües desúmense nes fondigonaes del Val.le'l Marqués, siendo el sumidoriu más nidiu la Cueva'l Moruquin, a 1.590 m.s.n.m.

Esta Cueva’l Moruquín foi esplorada mentantu los años 70 de la pasada dómina pel Grupu Espeleolóxicu Matal.lana (Lleón). Tien un desendolcu de 530 m. y una fondura de -30 m., finando nún meandru torgau per costeros (nicios estrayios del Archivo de Cavidades Leonesas, Tomu I, asoleyáu pela Delegación Lleonesa d'Espeleoloxia en marzu de 1983).

La primer esploración de la Cueva'l Pozu l'Infiernu foi fecha nel añu 1968 polos espeleomerguyadores del G.E. Edelweis (Burgos) Joaquín Plana, Pedro Plana y Aurelio Rubio (http://acurti.es/r4r).

En 1982, Carmen Portilla y Pepe Medina del STD (Madrid) entamen la esploración d'esta surdencia algamando alredor de 40 m. de fondura. Describen una galería franca de piedra prieto y agua daqué veyao. El 1 de Payares de 1986 somorguiáronse nesti sifón J.M. Gutiérrez y F. Ruiz, del G.E.S. de la SEM (Málaga), morriendo los dos nel interior de la galería (http://acurti.es/s4r).

Nel llibru "Técnicas de Espeleobuceo", de Fidel Molinero y asoleyau pol Espeleo Club de Grácia (Barcelona) en 1999, faise una descripción del accidente:

"Sifón con aguas excesivamente frías. La baja temperatura de las aguas pudo causar una hidrocución a uno de los buceadores, cuyo cuerpo se precipitó al fondo del sifón. El compañero, presa del pánico, debió intentar salir precipitadamente (chaleco inflado a tope) y fue a empotrarse en uno de los techos de la diaclasa inundada. La instalación, montada anteriormente por espeleobuceadores del antiguo club STD, era correcta".

En 2005, Enrique Ballesteros, de la Comissió d’Espeleobusseig de la Federació Catalana d’Espeleologia visita la cavidá, percorriendo la llinia montada por STD y atopando a 40 m.  de fondura un  carrete abandonáu mentantu l’acidente de 1985.

L’acidente socedíu nel 1985 impresionó muncho a la xente de Vegacervera, prohibiendo'l Conceyu l’acesu a la cueva y nun permitiendo la continuación de la esploración. Per otra parte, la surdencia abastez d’agua a dellos llugares de l’arrodiada polo que fízonos falta pedir permisu pa la esploración al Conceyu de Vegacervera, permisu que mos foi concedíu.

Na seronda de 2008 merguyamos pa facer un reconocimientu de la cavidá, atopando namás que cachos de llinia rotos y enllordiaos pela galería somorguiada. Montamos 100 m. de llinia nueva y algamamos 40 m. de fondura. Al ver que la cavidá sigue con bones perspectives plantegámonos facer una serie de trabayos que faciliten el carretar el material dica la poza’l sifón. N’estos caberos 20 años la cueva sofrió una gran cambiu, al construyir l’Ayuntamientu de Vegacervera una presa de 5 m. d’altor qu’embalsa l’agua y que fizo subir el nivel de l’agua la cueva, llegando a trabayar como surdencia actual tamién una cueva asitiada unos metros más alta averada a la carretera. Esta presa tien el peligru d’una mala caída y que la fuerza l'agua arrastre’l material, polo que ye necesaria la instalación d’un pasamanos y una escalera p’algamar cómodamente la poza’l sifón. Repárase tamién la pasarela metálica y montamos una tirolina pa carretar material de merguyu dica la poza'l sifón. La temperatura l'agua (7ºC) y la descompresión obligada fai qu'usemos una  mecedura de 28/25. Un porcentaxe d’Oxi que mos permita una ppO segura a 40 m. y unes pingarates d’Heliu que nos caltenga la cabeza clara. L'usar esta cantidá d’Oxi más EAN 50 y Oxi pa la deco ye pa mirar de tar el menor tiempu posible quietu nel agua y nun pasar tanto fríu.

L’iviernu fai que dexemos les esploraciones dica’l branu de 2009, cuando'l 8 d’agostu montamos 170 m. de nueva llinia algamando un desendolcu  total de 270 m. de galería y dexando la esploración a 10 m.f.  Nesta inmersión, magar d’usar argón pa los traxes, pasamos más frio que na nevadona del 41, asina que plantegámonos pala prósima vegada preparar xilecos elléctricos con bateries bastante pa 2 hores.

Pero nun ye hasta esta primavera de 2011, tres de les xorrecíes del esxelu, que volvemos a Vegacervera. El 10 de xunu móntase tola instalación de tirolina, escalera y pontona, y dexase tol material na poza’l sifón. El sábadu 11 un equipu de dos merguyadores continúa instalando llinia y sal a los pocos metros a una galería aeria pero que nun esploren yá que nun son quién a esguilar per unos costeros que torguen la continuación.  El primer sifón del Pozo del Infierno tien 300 m. de desendolcu y una fondura másimo de 41 m. Tola galería somorguiada ta nortiada según la resquiebra que s'aprecia na entrada con un nidiu rumbu Este. La temperatura l’agua esti dia ye de 8ºC.

Pela tarde, otru equipu de tres merguyadores ye quién pa esguilar pelos costeros y montar un tendal pal material. La galería tien unos 40 m. de desendolcu col suelu lleráu de costeros y llábanes entornaes muncho mui resbarioses, que faen abegosu'l caminar con pesu penriba d’elles. Al otru llau de la galería entama otru sifón al que hai qu'amiyar per un costeru, faciendo falta l’aida d’otra persona pa poder salir. La nueva galería somorguiada ye grande, baxando vertical na mesma poza’l sifón y siguiendo con una seición grande mentantu unos 70 m. a 14 m.f..  Nesti tramu la galería nun presenta sitiu dalu p’amarrar el filu nin nes paredes nin nel fondu, asina que recoyóse’l filu dica una pequeña campana. Tanto la galería aeria como la galería somorguiada del segundu sifón siguen empobinaes al Este. Tornando, el primer sifón amosónos la so cara más fea: más de 280 m. de galería ensin visibilidá dala. De toles maneres, la cueva sigue, asina que seguiremos p’alantre.

Na cota de 41 m.f. atopamos dos llinternes, una bolsa de filu del STD y unes gafes rotes. Camentamos que quedaron ehí dende l’acidente de 1985… y ehí quedaron…

Pozo del Infierno, 2011 from JAVIER LUSARRETA on Vimeo.

 Andechiegos:

Jorge Agüero (G.E. Gorfolí-Asturies)

Raúl Agüero (G.E. Gorfolí-Asturies)

Isidro Baides (G.E. Gorfolí-Asturies)

Enol Bernardo (G.E. Gorfolí-Asturies)
Rafael Bernardo (G.E. Gorfolí-Asturies)
Oscár Cuadrado (G.E.  Gorfolí-Asturies)
Ángel Fernández (G.E. Gorfolí-Asturies)
Javier Lusarreta (S.E. Lenar-Cantabria)
Jason Mallinson (Cave Diving Group-Great Britain)

Xesús Manteca (G.E. Gorfolí-CDG)

Alberto Medina (G.E. Gorfolí-Asturies)
David Pérez (G.E.S. de la SEM-Málaga)
Francisco Solís (G.E. Gorfolí-Asturies)
Leopoldo Trabanco (G.E. Gorfolí-Asturies)

 

"Vite en Xixón, vite en La Bana tomando anís de La Praviana, vite en Xixón, vite yo en Sama tomando anís de La Praviana"

Vistes del Val.le'l Marqués (Vegacervera)

Foces de Vegacervera (Lleón)

El Correcillas (2.007 m.s.n.m) dende'l Colláu de Cármenes (1.340 m.s.n.m.), remanando'l Val.le'l Marqués

Dende la Forca (1.664 m.s.n.m.), dando vista a La Ensancha, que separta los sumidorios de La Camperona, u s'atopa la Cueva'l Moru Quin ó Moruquil

Escar de Fresneda (1.685 m.s.n.m.)

Sumidorios de La Ensancha (arriba) y La Forca (abaxo), los más averaos a la Cueva del Pozu l'Infiernu, asitiada 400 m. más abaxu nes Foces de Vegacervera

Cueva del Pozu l'Infiernu (Vegacervera, Lleón)

La Cueva'l Pozu l'Infiernu, en carga

La presa

Montando la tirolina pa tresportar el material

Equipándose na presa

Deco a 6 m.f. con oxi.

Restos del accidente de 1985, a -40 m.f.

La cueva averada a la carretera qu'anguaño fai de trop-plein de la Cueva del Pozu l'Infiernu

Sifón

A la gueta surdencies, nel ríu Toríu

Facémoslo curiosino...

 
 
 
 
 
   
enlace con la página espeleoastur.as