Torca Castil

Javier Lusarreta (SE Lenar-Cantabria, Ensame Aguarón-Asturies)
Artículu asoleyáu en Plongeesout Magazine Nº3 (www.plongeesout.com)

Torna: Xesús F. Manteca (G.E. Gorfolí - Asturies)

“Lauri, ¿cómo sigue’l meandru?...Toi hasta los mismísimos, mira que tener que retopografiar esto, aquí y asina…”. L'equipu anterior tuviera problemes col clinómetru, y había que topografiar otra vegada. El premiu merezco, tamos a -1.000 mas ó menos, y esti meandru fina nún sifón. Más sero, pasaos los nicios a llimpio, comprobóse que tábemos a -1.019 m. de fondura. El nuesu primer -1.000 n'esploración. “Mira Lauri, qué pasada de llagu. Tol agua los dos rios desúmese ehí, y col tamañu d’estes galeríes, de xuru que garramos un colector perinteresante".

"¡Qué, Javier! ¿metémonos l’añu que vien a merguyar?".

"¡Anda, venga!... ¡Nun me toques los güevos!".

La idega foi garrando forma, había que dixerila bien, y camentamos intentalo.  Dientro la nuesa relativa inesperiencia nel merguyu en cueves (fond du trot ó como se diga), esto yera un retu interesante, la primer vegada que se merguya en Picos a -1.000.

Lo primero foi esparexar l’equipu, dientro de les nueses posibilidaes, lo más llixeru posible. Decidímonos por botelles de 6 ll. a 300 atm, un cenciellu arnés pa colocar les botelles llaterales, un traxe neoprenu de 7 mm. de dos pieces, escarpinos, guantes, dos reguladores Poseidon 5.000, dos Aladin, compás, tablina, dos llinternes, dos focos caseros de 50 w con dos bateríes de 12 v. y 7 Ah, dos mázcares de merguyu, un par d’aletes, un collarón Fencwi 4x4, 4 kg. de plombu, y envede carrete, el filu metímoslu en dos bolses de PVC, en total 300 m... Tou esto, amás de 4 kg. de fluoresceína pa facer una coloración, tenía que metese en 4 saques… y metímoslo. Bien, yá tenemos les cuatro saques de 13 kg. cada una, agora hai qu’engañar a daquién pa que les baxe dica’l sifón, lo más difícil.

Topografía del Sistema Torca Castil-Torca Carbonal (-1,020 m). Macizu d'Urrieles, Picos d'Europa (Asturies). Pica nella pa vela más grande

Les entraes al pozu facémosles a media tarde, pa llegar al vivac (-915 m. f.) a la hora cenar y metenos al sacu ceo. Al otru día faise’l trabayu, nesti casu carretar el material dica’l sifón, merguyar, cenar otra vuelta nel vivac y al día siguiente, salir dempués de l’almuerzu.

Un tema importante yera asegurar al másimu la inmersión, polo que camenté que’l mió collaciu tenía que ser merguyador tamién y d’una talla asemeyada a la mía, pa sustituime en casu necesidá.

Javier Lusarreta, entrando al sifón de Torca Castil, a más de mil metros de fondura

"Cuando quieras Delrio, yo ya toi listu”. La baxada foi tranquila, a metá camín alcontrámonos col equipu que carretara les otres saques, charramos y seguimos. Tardamos unes 5 ó 6 hores en llegar al vivac, y tomamos daqué caliente. “Javier, ¿qué te parez si miramos de carretar les saques dica’l sifón?. Magar que se mos faiga sero, asina mañan diremos mas descansaos”. D’acordies. Unes hores más sero tamos cenando y alcordándonos, sobre too yo, del que dexó cayer una saca al agua dexando pingando parte del traxe neoprenu. A otru día madrugamos y empobinámonos al sifón. Aguamos tol material y, con una sensación de normalidá qu’estrañábanos a los dos, voi metiéndome nel agua y “Por Deva”, entamo la inmersión. “Javier, mentantu tu merguyes, voi mirar de pescar dalgún bichu, ¿val?.

Colorando con fluoresceína en Torca Castil. Un mes más tarde, les traces d'esta coloración detectámosles nel Farfáu la Viña, surdencia que vierte al ríu Cares, a 8 Km. de la torca

El sifón ye llimpiu, d’unos 2 m. d’altor y alredor de 10 d’anchor, y en forma de V. Tres de 75 m. con una fondura másima de 9 m. saco la tiesta nuna sablera.  Al mirar lloñe solo veo escuridá. Aseguro’l filu nel techu y ya de pie veo que toi nuna gran galería, de la que nun veo la fin. Atalanto quitame l’equipu y esplorar esta galería. Tol percorríu ta tapizáu de sable fino, ensin repla y muncho bien horizontal. El techu sigue siendo’l cabalgamientu que veíamos enantes del sifón. Cien metros más p’alantre, llego a otru sifón enforma más estrechu. Métome nel agua  a ver que veo… ¡y nun veo un res!, magar que toi poniendo munchu procuru, nun puedo evitar que’l sable veye l’agua.

“Tiro ó nun tiro. Colo que mos costó convencer a la xente pa que mos echara un gabitu… colos problemes de xorrecíes d'agua que tien la torca… colo estrechu que parez esti sifón, colo… colo... meyor non…”.

L'agua la torca, verde tres de la coloración

La torna pel sifón foi sele, topografiando, mirando los cientos de niphargus qu'hai, y pensando si fice bien en dar la vuelta. Al salir, Delrio taba en plena cacería. “¡Coime! Ya tas equí… ¿qué tal?... ¿cómo ye’l sifón?... ¿cómo de llargu?... ¿cómo de fondu?... ¿cómo…? ¿cómo…?. Cuento-y al mió collaciu tolos pormenores de la esploración y ponémonos a recoyer el material, cada cosa na so saca. Una vegada iguao’l material, preparamos la fluoresceína y chámosla al agua. ¡Ye ablucante ver como’l llagu vuélvese verde!.

El regresu ye eufóricu, pero esa sensación de normalidá  va pasando factura y dempués de cenar, tola tensión y la emoción contenida llegó de sutrucu. “Delri, ¿nun tas frayáu?... ¡Tengo una paliza!. La nueche nun ye tranquila, una de les dos hamaques, ¡la mi hamaca!, ta rota y asina como ta nun puede usase, asina que buscamos una solución y pasamos la nueche como podemos. La torna a la superficie ye llarga, 11 hores, y trebeyosa. Parez que la cueva ta molesta con nos por desvelar ún de los sos secretos. Nel camín , atopámonos col equipu que baxa a recoyer les saques que queden. Nun pusieron un bon xeitu cuando-yos cuntamos lo de la hamaca, pero…

Xosé Lluis del Río y Javier Lusarreta, celebrando'l primer merguyu en Picos a mil metros de fondura

Un mes más sero salíen les primeres traces de la fluoresceína pel Farfáu la Viña, surdencia asitiada nel Ríu Cares, a 8 km. de la torca.

Nel branu d’esti añu 2007, cumpliránse 20 años d’esploraciones nesta fastera de Los Urrieles, averada al Picu Urriellu, y 9 años del merguyu en Torca Castil (añu 1998), -1.028 m. de desnivel y un desendolcu de 4.400 m. Cuando merguyamos en Torca Castil entá nun taba xunida a la Torca Carbonal (CT-14), cola entrada más baxa pero muncho más estrecha. Los sofridos carretadores foron: Salvador Rodríguez (Spidi) y Alfonso Calvo per un llau, y per otru, Alfredo Moreno y Olivier Ubiergo. El mi collaciu de fatigues foi Xosé Lluis del Rio.

Nel vivac, entá eufóricos

Javier, fuera la torca y nel chigre más afayadizu...