Los Güeyos de la Texa

Xesús F. Manteca (GE Gorfolí - Asturies)

Entamu

Los Güeyos de la Texa ye una de les más importantes surdencies de El Cornión (Macizu Occidental de los Picos d’Europa). Alministrativamente esta fastera’l macizu pertenez al Conceyu de Cangues d’Onís.

Conozse como Güeyos de la Texa a un garrapiellu fontanes asitiaos un poco perbaxu de la Vega Orrial, que al surdir l’agua na superficie y amestase los caudales onde entama’l valle a zarrase, forma’l Ríu Redemuña, nomau más abaxu como Ríu Pomperi. D’ente estos fontanes ye’l cimeru el que s’atopa al llegar a La Texa, allugáu a la mandrecha’l valle pola bayura d’agua que surde equí. Ye, amás, l’únicu que tien una entrada afayadiza al cursu activu interior.

Estes agües que surden equí atalantamos que vienen de Les Barrastroses, Cembavieya, y alredores de la Torre los Traviesos (2.390 m.s.n.m.), nomada tamién como Torre l’Alba, y traviesen perbaxu la Vega H.ustillagar.

Pescanciamos tamién que nun tan relacionaes col Frieru H.ustillagar, y que les agües que traviesen esta cavidá surden dempués na Cueva’l Vientu ó Fonte los Vafos, siendo namái que’l resultáu de l’agua desumío nel escar asitiáu so la cueva. El nome de La Texa ta nidio que vien pola bayura texos que hai nesti valle y nomalu “La Teya” ye espardir un tracamundiu asoleyáu en dellos planos.

Les cordenaes, sigún el Mapa Excursionista de El Cornión, Macizo Occidental de los Picos d’Europa, escala 1/25.000, asoleyau per Miguel Angel Adrados son :

Los Güeyos de la Texa

Descripción de la Cavidá

Enriba’l fontán atópense les tres entraes a la cueva, de les cuales dos ya yeren conocíes anantia. Per una d’elles ye pela qu’entraron los espeleólogos franceses del S.C.O.F. nos años 70 pa esplorar y topografiar esta cavidá fasta l’entamu’l sifón. La otra entrada ye muy nueva, quiciabis nun tenga más de 5 ó 6 años y fízose al fundir el techu d’una pequeña sala onde l’agua garra muncha fuercia. Esta entraduca ye un pozín de menos de 2 m.p. que dexa ver cómo’l ríu cai per un remexón fasta el nivel del fontán y que continúa per una gatera a presión con abondes formes de corrosión. La gatera fina nún cómodu meandru, dexando a la manzorga la entrada usada pelos franceses, fasta algamar una esguilada de 3 m. Enriba d’esta esguilada hai una sala ocupada por un argayu de grandes costeros ú hai que guetar la continuación a la manzorga, fasta dar col ríu otra vuelta y esguilar per una cascada. Equí la galeria enancha, apruciendo la otra entrada marcada na topografía de S.C.O.F. como impenetrable. Darréu, la galería principal fai un duck que da pasu a la galería enantes del sifón.

Esti sifón ye ampliu y llimpiu, coles paredes de roca vivo, y d’una güeyada vese l’espeyu del otru llau, yá que nun tien más de 3 m. de llargor y 1,5 m. de fondura. Pasando’l sifón atópase una galería medio inundao d’un par de metros d’anchor con dalgunes estalactites pequeñes en techu. Tien un llargor de 10 m. y torna a somorguiase nún segundu sifón.
Esti sifón ye tamién curtiu, 2 m, y sal a otra campana más pequeña que la primera que dexa ver una posible continuación seca averada al techu. P’algamar esta ventana hai que facer una esguilada per unos costeros que paecen poco fiables. So d’esta ventana entama’l tercer sifón ente unes piedres que cuasi zarren el pasu, dexando una estrenchura difícil de pasar de nun llevar les botelles na cintura. Tres lde a estrenchura vertical escomencipia una galería a presión de 3 m. d’anchor que baxa pasu ente pasu dando una curva haza la manzorga. El suelu ye de grava y cantos rodaos y les parés llimpies. Dempués de la curva la galeria ponse más pindia y algama el puntu mas fonderu del sifón: -9 m.f., tres d’un percorríu de 25 m. de llargor. Darréu, el sifón xube vertical fasta los 5 m.f. y torna nortiase al sur nuna galería abierta a favor d’una resquiebra vertical con un altor de 4 m. y un anchor d’unos 3 m. El sifón sigue asina fasta dixebrase en dos galeríes: una d’elles zarra a los pocos metros y la otra entama xubir pasu ente pasu, nortiándose al sudeste fasta salir a una pequeña campana. Esta campana tien dalgunes formaciones y un estrenchu llaminador ascendente. So la campana la galería sigue somorguiada con una ponte piedra que separta’l conductu en dos. Diez metros más de llinia y el sifón fina nuna poza onde cai l’agua que llega per una galería vadosa.

>> ver topografía

Espeleometría

Estos son nicios tomaos con fecha 17 d’Agostu de 1997.

Desendolcu total = 306 m.

Fondura másima somorguiada = -9 m.

Desendolcu somorguiáu = 104 m.

Desendolcu ensuchu = 203 m.

Desnivel másimu = +30 m.

Temperatura de l’agua = 4º C.

Temperatura de l’aire = 3º C.