EL GÜEYU DEVA

X.F. Manteca (Grupu d'Espeleoloxia Gorfolí)

HESTORIA DE LES ESPLORACIONES

No están todes les inmersiones, pero sí algunes entre 1996 y 1999. Seguirá...

16 d’Ochobre de 1996
Juanjo y Teca faen un reconocimientu del llugar, descubriendo n’apnea una galeria somorguiada de cómodes dimensiones.6 d’Abril de 1997. Teca fai un primer somorgamientu nel fontán. Avanza 40 m. per una galeria grande a 4 m. de fondura. Algama una campana grande ensin orielles y la cueva sigue somorguiada coles mesmes dimensiones. L’agua veyase daqué. Tiempu d’inmersión 25 menutos.

Dempués entren Juanjo y Delri a seguir instalando pero atascose-yos el carrete. Al intentar igualu revolvieron la basa y veyaron l’agua, asina que salieron y volvieron a entrar dempués pa facer ambientación. Tiempu d’inmersión 30 menutos.

Hai un primer contáutu con D. Alvaro Armada, Conde de Revillaxixeu, qu’amuesase perinteresau n’esta xera.

Andecharon Fran, Marife, Eva, Rebeca, Carlos, Delri, Juanjo y Teca.

18 de Mayu de 1997
Somorguiense Javier y Teca. Igüen na primera campana l’amarre con dos boyes. Dempués Teca ruempe’l chalecu-collarón, asina que tien que salir pa dexalu nel esterior. Esploren fasta’l final de la Galeria Grande. Tiempu d’inmersión 49 menutos.

Andecharon Zape, Arantxa, Estíbaliz, Paqui, Sinu, Merche, Lauri, Fran, Delri, Marife, Carlos, Trubia y Teca.

15 de Xunu de 1997
Entren Isidro y Juanjo pa instalar el cuartu sifón. Somorgiase n’elli Isidro, y dempues de facer un trebeyosu amarre avanza unos 30 m. fasta que l’agua véyase. Como nun atopa un bon sitiu p’amarrar el filo torna a la Galeria Grande recoyendo llinia. Llueu intentalo Juanjo pero l’agua entá ta veyao. Salen al esterior dempués de 1 hora d’inmersión.

Dempues de xintar entren Juanjo y Teca, esti caberu con bombones de 12 ll. Pasen el sifón caberu y atopen otra galeria inundada. Tres esta pasen otru sifón y alcuentren la Galeria la Columna Juanjo esplorala fasta’l nuevu sifón que zarra la galeria. Faen delles fotos y tornen al esterior dempués de 1 hora y 27 menutos d’esploración. Fasta la fecha d’anguañu hay 300 m. de filo-guia instalao.

Andecharon Juanjo, Isidro, Marife, Fran y Teca.

22 de Xunu de 1997
El plan d’inmersión ye facer fotos somorguiaes y continuar l’esploración del nuevu sifón. Entren Delri y Teca, pero cuando lleguen a la Galeria la Columna Delri ya ta nel terciu de vuelta. Queda esperando na galeria demientres Teca esplora el nuevu sifón, trespásalu y esplora una nueva galeria seca que zárrase na poza d’otru sifón. Faen dalgunes fotos na galeria y tornen al esterior dempués de 1 hora y 39 menutos d’esploración.

A la tardi facemos una visita pel Monte Deva y los posibles sumidorios qu’alimenten el Güeyu Deva. Xurde Morán, de la Tertulia Cultural El Garrapiellu, acompangonos al Valle’l Riosecu, atopando un sumidoriu que ta a menos de 2 km. de la surdencia. La Tertulia Cultural El Garrapiellu ta faciendo un trabayu d’etnografia sobre la parroquia de Deva y hay dellos nicios que pueden servinos pa’l nuesu trabayu d’esploración.

29 de Xunu de 1997
Esti dia, dempués d’una selmana ensin parar de llover, l’agua que surdia pela Fonte’l Güeyu salia esblanquiñada, llechosa. Casique nun se vía’l fondu la poza. Anque la idega yera qu’entraren Juanjo y Teca a esplorar, camentamos que les condiciones nun son les más afayaizes y decidimos qu’entren Isidro y Delri a facer ambientación y saber cuales son les condiciones internes de la cavidá. Llegaron a la segunda campana col’agua veyao del tóo, sin ver más que la manu y el cachín de filo garrao. Tuvieron dientro 25 menutos.

Andecharon Fran, Juanjo, Isidro, Delri y Teca.

3 d’Agostu de 1997
Estrenamos el compresor. Esto fai posible que Juanjo y Teca somorguiense coles botelles cargaes a 250 bar. Esploren el sifón algamau el 22 de Xunu. Esti ye cortu y descubren tres d’elli una galeria seca con abondes formaciones pela que caleyen más de 150 m. de desendolcu fasta alcontrar un nuevu sifón. Na poza d’esti sifón faen un fitu pa señalalu por si nun fuera el principal. Tamién igüen la instalación ente la segunda y la tercera campana, montandola pela galeria grande que hai penriba el costeru. Tiempu d’esploración 2 hores y 42 menutos.

El plan ye continuar la esploración en prósimes feches. Andechen Eva, Ricardo, Marife, Juanjo y Teca.

22 de Payares de 1997
Delri, Isidro y Teca lleguen fasta’l sifón décimu faciendo fotos, pero un error al colocar el carrete na cámara fai que nun se llogre nenguna. El riu vien xorreciu y tienen dellos problemes col material, tresmanando nel octavu sifón dos pastilles de llastre. 29 de Payares de 1997. Isidro,Teca y Carlos Ulecia faen un aforo de caudal, dando un resultao 295,5 ll/sg. ó 17,55 m3/minuto.

28 de Febreru de 1998
Delri y Teca entren nel Güeyu Deva a facer fotos seguios de Javier y Lauri que van facer la punta del sifón décimu. Pa esto, caún carreta una bombona de más pa usar dempués del sifón sétimu. Al pasar el sifón octavu atopen un plomu de los tresmanaos na cabera esploración.

Na galeria del Altar de Deva, Lauri sientese mal, asina que esplora solu Javier el sifón caberu. Esti ye un llaminador peranchu, unos 7 m., pero muy baxu, algamando namai que n’algunos sitios 1,5 m. d’altor. Javier esploro 90 m. en condiciones abegoses d’agua veyao y tuvo que recular dellos metros por nun haber sitiu pa dar la vuelta. Tiempu d’esploración nel sifón décimu : 27 menutos.

Plantegámonos si esto ye’l final de la cueva, ya que la esploración parez enforma arriesgada. Entá queden un par de galeries llaterales por mirar que igual dan pasu a otro sifón más afayaízu. Tiempu total d’esploración : 3 hores 54 menutos. Sofitaron Carlos, Isidro y Viqui.

4 de Xunetu de 1998
Juanjo y Teca entamen les llabores de topografia, algamando la Galeria la Columna y dexando la punta topografia nel entamu del sétimu sifón. Faense tamien delles fotos. Al salir Juanjo tien dellos problemes col aire que igüa cola so calma de costume.

Tiempu total : 4 hores 12 menutos. Sofitaron Carlos, Isidro, Delri y Trubia.

13 de Setiembre de 1998
Somorgamientu albuertau por dellos fallos nos sistemes de llume, flotabilidá y preparación sicolóxica. Dexamoslo pa otru dia. Andecharon Javier, Isidro, Delri, Teca, Luis y Spidi.4 d’Ochobre de 1998. Dempués d’una selmana de temporal fuerte intentamos un nueu somorgamientu n’abegoses condiciones de veyura. Ye casi imposible ver la llinia a nun ser que s’arime enforma al focicu. Andecharon Isidro y Teca.

31 d’Ochobre de 1998
Sigui’l mal tiempu. Averámonos al Güeyu Deva pero nun paga la pena nin metese nel agua. El fluidu que surde de la fonte ye daqué más asemeyao al llechi que al agua. Andecharon Isidro, Juanjo y Teca. Como nun podemos merguyar vamos pa L’Infiestu (Piloña) a la folixa’l C.A.D.E. pa cellebrar la fin de la campaña en Torca Castil. Cambiemos les botelles de vientu por botelles de sidre. Ya acertemos.

1 de Payares de 1998
Dos dies dempués de la xornada d’ermanamientu entá tenemos el garguelu cascau y el porlmón enllenu fumu, pero entá tenemos ganes de merguyar. El problema ye que nun solo llovió sidre enriba nos sinon tamién enforma d’agua, asina que’l Güeyu Deva trai más agua entá. Plantegamosnos dexar lo que queda por topografiar pa la prósima primavera. Andecharon Isidro, Delri, Mari y Teca.

7 de Febreru de 1999
Isidro y Teca intenten topografiar más p’allá de la Galeria Grande, pero cuando lleguen a la punta topografia deciden tornar al esterior por dellos problemes de Isidro col so traxe. Sofitaronlos Juanjo, Delri y Fran.

23 de Mayu de 1999
Isidro, Javier y Teca esploren y topografien la galeria llateral que taba a la manzorga del sifón caberu. Con ella algamase más de 1.000 m. topografiaos. Fina nún argayu que torga la galeria. Por razones nidies pa los esploradores camentase nomar esta galería como la Abegosa Galería de l’Abegosa Fame. Puede considerase la esploración terminada. En total ficieronse 6 hores de trabayos dientro.
Desendolcu a data de güei 1.072,6m.

8 d’Agostu de 1999
Isidro y Teca, sofitaos por Agüero esploren una nuea galeria aérea paralela a la Galería la Columna. Incrementase el desendolcu en 82 m. más.
Desendolcu a data de güei 1.154,6 m.
Faense tamien delles semeyes.

16 d’Agostu de 1999
Isidro, Juanjo y Teca lleguen fasta la Galeria la Columna faciendo semeyes. El xueves 19 en conversación con Juanjo el Presi apúntase la idega de facer un pozu que comunique col esterior un puntu dempués del argayu que torga la “Abegosa Galeria de l’Abegosa Fame”.

22 d’Agostu de 1999
Isidro y Teca faen otru somorgamientu col envís de facer más semeyes. Llevamos ya tres carretes de diapos fechos y agora entamen a vese los resultaos.

El 1 de mayo de 2002, damos por finalizada la exploración del Güeyu Deva, a falta de que algún día alguien se encuentre con ganas de tratar de forzar el laminador terminal. El periodo que falta en el diario de exploración, trataremos de colgarlo algún día.

>> les semeyes