Pozu Les Cárcuves
Los Robles del Conceyu
Cueva negra y otres cueves superiores...
Xerra Santienes, Ribesella - Asturies

Asitiase nel llugar conociu como Los Robles del Conceyu, averada a Camangu, nel Conceyu Ribeseya. Les sos cordenaes UTM, sigún la fuella 31-II, Nueva, escala 1/25.000, del Mapa Topográfico Nacional de España son:

X= 337.037, Y= 4.811.312, Z= 80 m.s.n.m

Descubierta y esplorada en 1989 pela Sociedá d’Espeleoloxia y Grupu de Ciencies de la Tierra del Politecnicu de Liverpool, esta cueva nun enforma llarga ye una ablucante surdencia qu’amuesa delles etapes de desendolcu y un sifón perguapu d’agües clares. Les agües que surden equí son cautaes no alto la Xerra del Altu la Cueva (744 m.s.n.m) al travies de dellos sumidorios y cueves. En 1992, Shaun Ainley y Chris Danilewicz, del Cave Diving Group de Gran Bretaña, seición de Leeds, merguyen dos sifones y esploren tres d’ellos 400 m de desendolcu en Cueva negra fasta llegar a una chimenea. El 5 de Setiembre de 1994 una nuea espedición británica fai delles esguilaes tres los sifones e intenta trespasar un estrenchu sifón sin resultaos dalos. Nun hai topografia fecha más p’alla de los sifones.

El 29 de Payares de 1998, Juanjo y Teca, miembros del Ensame Aguarón, sofitaos por Juan Andrés, Teresa, Pablo y Willy de la S.E. Hades y por Trubia y Raul del G.E. Gorfolí trespasen el primer sifón y algamen la sala inundada que ye’l pielgu del segundu sifón. Esti ye un pozu vertical inundau de más de 5 m. de fondura y otros tantos de diametru que llama poderosamente a merguyalu. Aprovechase pa facer delles semeyes n’esti agua tan clara. Volveremos nel añu 1999 pa facer la topografia tres los sifones.

1,2,3 y 4 d’Abril de 1999
Magar que el primer plan pa la Selmana Santa yera seguir cola esploración de Fonte Obaya, les abondes lluvies cayies durante les selmanes anteriores fizonos decidinos por continuar la esploración de la Cueva los Robles del Conceyu. Contamos cola participación de Carmen Portilla y Alfonso Antxia, además de 6 miembros del Nucleo de Espeleologia de Condeixa. Por parte del Ensame Aguarón andecharon Isidro, Marife, Rocio, Ricardo, Eva, Jorge, Trubia, Delri, Juanjo, Fran, Laura, Pepo y Teca del G.E. Gorfolí, Javier del C.D.U. San Gregorio, Merche, Sinu y Kolo del S.E. Lenar, Alfonso del S.E. Burnia y Luis del G.E. El Cuélebre.

Esploración de les galeries tres del segundu sifón de la Cueva los Robles del Conceyu. Fizose una esguilada y atoparonse 100 m. de galeria onde fai falta facer otra esguilada. Andecho l’Ensame Aguaron-G.E. Gorfolí col Nucleo de Espeleologia de Condeixa y con Carmen Portilla y Alfonso Antxia.

30 d’Abril de 1999
Javier y Lauri esploren el tercer sifón de la Cueva los Robles pero esti estrechase a los pocos metros.

2 de Mayu de 1999
Como seguimos ensin recibir la información de la faza que nos tien que mandar la F.As.E. facemos un percorriu de la parte alta de la Xerra l’Altu la Cueva. Na Selmana Santa, Ricardo, Eva y Marife caleyaron el cantu la xerra atopando dellos sumidorios posiblemente esploraos peles espediciones ingleses. Esta vegada metemos la furgoneta fasta’l final de la pista del Riu de Nueva. Dende equi solo queda media hora de camín p’algamar Conegra. Facemos un reconocimientu de la cueva fasta atopar la galeria torgada pel sable. De los más de 500 m. que dicen los ingleses solo pueden recorrese alredor de 100. Averada a esta ta la que nomen los ingleses Cueva los Güesos, pero tamien ta zarrada unos metros dempués de la entrada per un argayu costeros. Un poco más pa l’Este alcontramos nuna fondigonada lo que creyemos que ye la Cueva’l Pequeñu, pero ye otra cavidá que termina dempués de baxar unos 35 m. de fondura en dellos pozos.
Andecharon Fran, Isidro, Ricardo, Juanjo y Teca.

8 y 9 de Mayu de 1999
El sábadu llogramos aclarar onde tamos. Lo que pensamos que yera Conegra ye la Cueva Yedrales. Conegra alcuentrase más pa ocidente. Atópase por fin Cueva Negra y llégase fasta’l sifón. Ta merguyau pelos ingleses. Tamien intentase destorgar el tapón de sable de la Cueva Yedrales fasta llegar a una estrechura que ye l’orixe del tapón.

más información:
>> Pincha aquí para encontrar información sobre Cueva Negra en los Northern Pennine Club reports
>> Topografía de Cueva Negra, este enlace te permitirá descargar una hoja excell realizada por Danilewic
>> web con fotografías de Cueva Negra, especialmente interesante desde el punto de vista geológico